上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
8
清氣癩𰣻的人
( 可 1:40-45 路 5:12-16 )
耶穌已經落山，歸大陣的人隨伊。
2 抵當有一個癩𰣻的就近來拜伊，講：「主啊，你若肯，就會互我清氣。」
3 伊就伸手摸伊，講：「我肯，你通清氣！」伊的癩𰣻連鞭清氣。
4 耶穌閣給伊講：「謹慎莫得給人講，獨獨去將本身互祭司驗，亦著獻摩西所吩咐的禮物，來做證據佇人。」
醫好百總的奴僕
5 ( 路 7:1-10 )
已經入迦百農，有百總就近伊，來求伊講：
6 「主啊，我的奴僕半𤻄，倒佇厝內艱苦到極。」
7 伊就給伊講：「我來去醫伊。」
8 百總應講：「主啊，你到我兜，我當𣍐起；你干單講一句話，我的奴僕就會好。
9 因為我亦是互人管的人，也有兵互我管；給此個講：『去！』伊就去；給彼個講：『來！』伊就來；給我的奴僕講：『行按呢！』伊就行按呢。」
10 耶穌聽見就奇怪，給隨伊的人講：「我實在給恁講，親像此號的深信，連以色列中，我未曾抵著。
11 我閣給恁講，對東對西，有多多人欲到，及亞伯拉罕、以撒、雅各坐桌佇天國；
12 若是國的子民欲抵著趕出佇外面的黑暗，佇遐欲有啼哭咬牙切齒。」
13 耶穌就給百總講：「去啊！照你的信，給你成。」抵抵彼時，伊的奴僕就好。
醫好多多破病人
14 ( 可 1:29-34 路 4:38-41 )
耶穌入彼得的家，看見伊的丈姆患著熱病倒啲。
15 就摸伊的手，熱就退；婦仁人就起來伺候伊。
16 到黃昏暗，有人導多多患著鬼者就近伊，伊用一句話趕出許個神，閣醫好一切有病的人。
17 就是欲應驗先知以賽亞所講的，講：
伊本身替受咱的軟弱，
擔當咱的病症。
欲跟隨耶穌的人
18 ( 路 9:57-62 )
耶穌看見歸大陣的人圍伊，就吩咐過去彼旁岸。
19 有一個經學士來，給伊講：「先生啊，你無論叨落去，我欲隨你。」
20 耶穌就給伊講：「狐狸有孔，天中的飛鳥有巢，獨獨人子無靠頭殼的所在。」
21 閣一個學生給伊講：「主啊，互我先倒去埋葬我的老父。」
22 獨獨耶穌給伊講：「你隨我；出在死人去埋葬𪜶的死人！」
平定風及海
23 ( 可 4:35-41 路 8:22-25 )
已經落船，伊的學生隨伊。
24 忽然海裡起大風湧，致到船互湧蓋；若是耶穌啲睏。
25 學生就近來叫伊起來，講：「主啊，救哦，欲無命啦！」
26 伊就給𪜶講：「小信的人啊，怎樣許無膽？」就起來，責備風及海，就大平定。
27 許個人奇怪，講：「此個是甚麼號人？風及海亦順伊！」
醫好加大拉患著鬼的
28 ( 可 5:1-20 路 8:26-39 )
已經過去彼旁岸，到加大拉人的地，有患著鬼者，二人，對塚墓出來抵著伊，勢面雄介介，致到無人敢對彼條路過。
29 𪜶忽然喉叫講：「上帝的子啊，阮及你有甚麼干涉？時未到，你來遮是欲苦楚阮嗎？」
30 離𪜶遠遠，有大群的豬啲討食。
31 許個鬼求伊，講：「你若趕阮，就差阮入豬群！」
32 伊就給𪜶講：「去啊！」鬼就出來，去入豬。忽然全群𧽵落山崁，入海死佇水裡。
33 顧豬者走去入城；將諸個事以及患著鬼的人所抵著的攏給人講。
34 通城的人出去尋著耶穌，已經見著，就求伊離開𪜶的地界。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。