上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
7
莫得批評人
( 路 6:37-38,41-42 )
「莫得批評人，才免抵著批評。
2 因為恁用甚麼批評來批評，亦欲按呢受批評；恁用甚麼量來量，亦欲按呢量互恁。
3 閣你怎樣看見兄弟目睭內的草仔幼，亦無想你目睭內的楹仔柴啊？
4 欲怎樣給你的兄弟講：『你目睭內的草仔幼互我給你提起來』，亦你目睭內竟然有楹仔柴啊？
5 假好的人啊！代先提去你目睭內的楹仔柴，才會明明看見，通提去兄弟目睭內的草仔幼。
6 莫得用聖的物互狗，亦莫得用恁的真珠㧒佇豬的頭前，驚了𪜶用腳踏伊，越輪轉來咬恁。」
求、尋、拍門
7 ( 路 11:9-13 )
「求，就互恁；尋，就抵著；拍門，就給恁開。
8 因為見若求的，得著；尋的，抵著；拍門的，就給伊開。
9 恁中間有甚麼人，伊的子給伊討餅，豈欲用石頭互伊？
10 抑是欲揲魚，豈欲用蛇互伊？
11 恁諸個雖然歹，猶久會曉得用好物互恁的子兒，何況恁佇天裡的父，豈無欲用好物互求伊的人嗎？
12 所以，恁見若愛人款待恁的，恁亦著按呢款待人，因為這是律法及先知。」
狹門
13 ( 路 13:24 )
「恁著對彼個狹門入。因為透到滅無的，彼個門闊，彼個路大條，對遐入的人多；
14 透到活的，彼個門狹，彼個路細條，尋著的人少。」
二種果子樹
15 ( 路 6:43-44 )
「謹慎持防假的先知。𪜶就近恁，外面是羊羔，內面是兇惡的豺狼。
16 恁欲對𪜶的果子來識伊。豈對莿帕挽葡萄？對蒺蔾挽無花果嗎？
17 按呢，見若好樹結好果子，歹樹結歹果子。
18 好樹𣍐結歹果子；歹樹𣍐結好果子。
19 見若樹無結好果子的就剉伊，㧒落火。
20 所以，恁欲對𪜶的果子來識伊。」
我識恁
21 ( 路 13:25-27 )
「見若稱呼我講：『主啊，主啊』的，無一盡入天國；獨獨行我佇天裡的父的旨意的才會。
22 當彼日多多人欲給我講：『主啊，主啊，阮豈是用你的名傳教，用你的名趕鬼，用你的名行多多權能嗎？』
23 就彼時我欲明明給𪜶講：『我攏識恁，做不法的，著離開我去！』」
二種起厝的人
24 ( 路 6:47-49 )
「所以，見若聽我諸個話來行的，欲比並智識的人，起伊的厝佇石磐頂；
25 雨落，大水到，風吹，沖著彼間厝，亦無倒，因為地基佇石磐頂。
26 見若聽我諸個話無行的，欲比並戇人，起伊的厝佇沙頂；
27 雨落，大水到，風吹，沖著彼間厝，就倒，閣伊的倒是傷重。」
28 耶穌講諸個話息，眾人奇怪伊的教示；
29 因為伊教示人，親像有權能的，無親像𪜶的經學士。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。