上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
26
會幕
( 出 36:8-38 )
「你做會幕著用十幅的帳。諸個帳是用過紡的幼苧及藍色、紫色、朱紅色的料，也用奇巧的工織成𠼻𡀔兵來做的。
2 每幅帳著長二十八肘，闊四肘，帳攏著一樣的寸尺。
3 此五幅帳著逐幅相連；彼五幅帳也著逐幅相連。
4 佇此個相連的帳路尾幅的邊仔著做藍色的紐襻；佇彼個相連的帳路尾幅的邊仔亦著按呢做。
5 你佇此領帳做五十個紐襻；閣佇第二領帳，相連的邊仔，也做五十個鈕襻，紐襻攏著二個二個相對。
6 閣著做五十個金鈎來鈎，互帳相連，就成做一個會幕。
7 「你著用山羊毛織十一幅的帳，做會幕頂的布棚。
8 每幅帳著長三十肘，闊四肘；十一幅帳攏著一樣的寸尺。
9 著將五幅帳連做一幅，閣將六幅帳連做一幅，彼個第六幅的一半互伊垂落佇布棚的頭前。
10 佇此個相連的帳路尾幅的邊仔著做五十個紐襻；佇彼個相連路尾幅的邊仔也做五十個紐襻。
11 閣著做五十個銅鈎，鈎佇紐襻，互布棚連做一個。
12 布棚的帳所剩垂落來，就是所剩彼個半幅帳，著垂佇會幕後。
13 布棚的帳所剩的長，此旁一肘，彼旁一肘，著垂佇會幕的雙旁來遮伊。
14 閣著用染紅公的羊皮做布棚的蓋；閣用海狗皮做蓋佇頂面。
15 「你著用皂莢柴做會幕竪的板。
16 竪的板長十肘，闊一肘半；
17 逐塊板著有二個榫相排。會幕一切的板攏著照按呢做。
18 著做會幕的板，南旁的南勢二十塊板。
19 佇諸個二十塊板的下面著做四十個銀臼，一塊板的下面有二個臼來穿伊二支榫，閣一塊板的下面也有二個臼來穿伊二支榫。
20 會幕第二面，就是北面，也著做板二十塊，
21 及𪜶的銀臼四十個；此個板的下面有二個臼，彼個板的下面也有二個臼。
22 會幕的後面，就是西面，著做六塊板。
23 會幕後面的二個角頭著做二塊板。
24 板的下長二個相同，直到頂面第一個環攏是完整的；二塊攏是按呢欲做角頭的路用。
25 著有八個板及十六個銀臼；此個板的下面有二個臼，彼個板的下面也有二個臼。
26 「你著用皂莢柴做橫楗：為著會幕此旁的板做五支，
27 為著會幕彼旁的板做五支，閣為會幕後的西面做五支。
28 板的對中彼支橫楗，著對此頭透到彼頭。
29 板著用金包，閣著做板的金環來套楗；楗也著用金包。
30 著照佇山頂指示你的款式起會幕。
31 「你著用藍色、紫色、朱紅色的料，及過紡的幼苧織帳簾，此個帳簾用奇巧的工織成𠼻𡀔兵來做的。
32 你著用皂莢柴做四支柱，用金包伊來吊帳簾，柱的鈎著金的，柱佇四個銀臼頂。
33 你吊帳簾著佇鈎的下底的所在，將法櫃扛入帳簾內；此個帳簾是給恁隔開聖所及至聖所。
34 閣著將施恩所安佇至聖所內的法櫃頂，
35 你著用桌下佇帳簾外，也用燈台下佇會幕的南勢；及桌相對，彼個桌著下佇北勢。
36 「你著用藍色、紫色、朱紅色的料，及過紡的幼苧，用綉花的工做布棚門的門簾。
37 著用皂莢柴給門簾做五支柱，用金包伊。柱的鈎著金的；閣著給柱鑄五個銅臼。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。