上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
阿摩司書
5
喉叫以色列人悔改
以色列家啊，著聽此個話就是我所論到恁的哀歌：
2 以色列百姓跋倒，𣍐閣起來；
受㧒佇地裡，無人扶伊起來。
3 因為主耶和華按呢講：
以色列家的城出一千人的，只有剩一百；
出一百的，只有剩十個。
4 因為耶和華對以色列家講：
恁著尋我，就得著活。
5 莫得尋伯特利，
莫得入吉甲，
莫得過去別是巴；
因為吉甲的確互人掠，
伯特利也欲歸佇無。
6 恁著尋耶和華，就得著活，
驚了伊親像火發出佇約瑟的家，
燒佇伯特利，無人拍熄。
7 恁諸個互公平變做茵蔯，
將公義㧒佇地裡的，
8 恁著尋彼個造昴星及參星，
互死蔭變做早起時，
互日時變做黑暗暝，
叫海水來傾佇地裡的──
伊的名是耶和華；
9 伊互強猛的忽然抵著敗無，
致到衛所抵著敗無。
10 諸個人怨恨彼個佇城門責備人者，
厭惡彼個講正直話者。
11 因為恁𧿬踏喪鄉人，
勒索伊的麥；
所以恁用雕琢的石起厝，
總是𣍐得著徛佇彼內面；
栽種好的葡萄園，
也無通飲伊的酒。
12 因為我知恁的罪過怎樣的多，
恁的歹怎樣的大。
恁歹款待義人，受賄賂，
佇城門口冤枉喪鄉人。
13 所以通達的人看見此號時勢，欲靜靜無講話，
因為時勢真歹。
14 恁著求好，
通求歹，互恁得著活。
按呢，耶和華──萬軍的上帝
欲及恁佇啲照恁所講。
15 著怨恨歹，愛好，
佇城門行公義的審判；
豈採耶和華──萬軍的上帝欲施恩佇約瑟剩的百姓。
16 所以主萬軍的上帝──耶和華按呢講：
佇一切開闊的所在欲有哀哭；
佇逐條街路欲有人講：
慘啊！慘啊！
閣欲叫作田人來啼哭，
叫𠢕唱哀歌者來哀哭。
17 佇攏總的葡萄園也欲哀哭，
因為我欲對你中間經過。
這是耶和華講的。
18 恁向望耶和華的日者有災禍啊！
恁啥事向望耶和華的日啊？
彼日是暗，是光，
19 是親像人閃避獅來走閣抵著熊，
入厝手倚壁，就互蛇咬著。
20 耶和華的日豈是暗暗無光？
黑暗無光明嗎？
21 我厭惡看輕恁的節期，
也無歡喜恁的嚴肅會。
22 恁雖然獻燒祭及恁的素祭互我，
我也無歡喜，
恁獻肥的精牲做謝恩祭，我無欲監納。
23 著互恁唱歌的聲離開我，
因為恁彈琴的調我無欲聽。
24 獨獨著互公平親像大水直直流，
互公義親像長流的江河。
25 「以色列家啊，恁佇曠野四十年，有用祭祀及禮物獻互我無？
26 恁扛恁的王西屈及恁的像基勻，就是恁的上帝的星，為著本身所造的。
27 所以我欲互恁受掠到大馬色的外面。」這是耶和華講的，伊的名是萬軍的上帝。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。