上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
何西阿書
2 著對恁的兄弟講，阿米，閣對恁的姊妹講路哈瑪。
不貞的歌篾──不忠的以色列
2 著及恁老母辯論閣辯論；
因為伊是我的某，
我也是伊的丈夫。
教伊除去面裡的淫亂
及伊胸坎的淫行，
3 免得我給伊褪光光，
互伊親像抵仔出世的日，
互伊親像曠野，親像乾燥的地，
互伊對嘴乾來死。
4 我無欲憐憫伊的子，
因為𪜶是對淫亂生的子。
5 因為𪜶的老母行淫亂，
懷孕者做出見誚事，
因為伊講：我欲隨我所戀愛的人；
我的餅，水，羊毛，麻，油及我所飲的，
攏是𪜶互我。
6 看啊，因為按呢，我欲用莿仔阻塞伊的路，
築牆互伊尋無伊的路。
7 伊欲追趇所戀愛的人，若是趇𣍐著；
伊欲尋𪜶，總是尋𣍐著，
就講：我欲倒去尋我的本夫，
因為我彼時的景況比現今猶卡好。
8 伊知伊的五穀、酒、油是我互伊，
加添伊的銀及金者，也是我；
伊用諸個服事巴力。
9 所以到收割的日，
我欲將我的五穀對𪜶提倒轉，
閣佇出酒的時，
欲將我的新酒提倒轉，
也欲將我互伊通遮赤體的羊毛及麻搶倒轉。
10 今我欲佇伊所戀愛的人的目睭前露出伊的淫行；
的確無人會救伊脫離我的手。
11 我欲息𪜶許個宴樂、節筵、月的初一、安息日，
及攏總的節期。
12 我也欲毀壞伊的葡萄樹及無花果樹，
就是講「這是許個戀愛我者互我的禮數」。
我欲互許個變做樹林，
互野獸食伊。
13 伊前日燒香服事諸個巴力，
閣用耳鈎及別號首飾家己妝飾，
隨伊相戀愛的人，來𣍐記得我，
因為按呢我欲辦伊。
這是耶和華講的。
上帝對伊的百姓的疼
14 看啊，我欲招呼伊，導伊到曠野，
用話安慰伊。
15 我也欲對遐賞賜伊葡萄園，
閣賞賜伊亞割的山谷做向望的門。
伊欲佇遐應聲，
及少年的日無各樣，
及對埃及地上來的日相同。
16 耶和華講：「當彼日你欲叫我講，我的丈夫啊，無閣叫我講，我的主啊；
17 因為我欲對𪜶的嘴除去諸個巴力的名，無閣用此個名紀念伊。
18 當彼日，我欲為著𪜶，及田野的走獸及空中的飛鳥，以及地上的蟲𧒴立約；我也欲對此個地方遏折弓刀，交戰，互𪜶安然倒啲睏。
19 我欲聘定你永遠歸佇我，閣我欲用公義、公平、慈愛、憐憫聘定你歸我；
20 我也欲用誠實聘定你歸我，你就欲識耶和華。
21 耶和華講：彼日我欲應答，
我欲應答天，天欲應答地；
22 地欲應答五穀、酒、油，
諸個欲應答耶斯列。
23 我欲為家己栽種伊佇此個地。
平素無得著憐憫者，我欲憐憫伊；
是我的百姓者，我欲對伊講：
你是我的百姓，
伊也欲講，你是我的上帝。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。