上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
1
但以理佇尼布甲尼撒的宮內
猶大王約雅敬坐位第三年，巴比倫王尼布甲尼撒來到耶路撒冷，圍來攻擊伊。
2 主用猶大王約雅敬，及上帝厝內器具的一份交佇伊的手。伊將𪜶帶到示拿的地，入伊的上帝的厝，用許個器具下佇伊的上帝的庫房內。
3 王吩咐太監長亞施毗拿，著對以色列的王親及貴族的中間帶幾若人來，
4 就是少年無瑕疪、面貌媠、有聰明智識、通達逐樣的學問、明白極致、夠額通跟隨佇王宮的，著教示𪜶迦勒底人的文學及言語。
5 王就分派將王所食的好物及所飲的酒，每日互𪜶一份，培養𪜶三年久。然後，互𪜶跟隨佇王的面前。
6 𪜶中間有猶大族的人：但以理、哈拿尼雅、米沙利、亞撒利雅。
7 太監長給𪜶號名：稱但以理做伯提沙撒，稱哈拿尼雅做沙得拉，稱米沙利做米煞，稱亞撒利雅做亞伯尼歌。
8 總是但以理立志無欲用王的好物及伊所飲的酒拍垃墋家己，所以求太監長容允伊免得拍垃墋家己。
9 上帝互但以理佇太監長的面前得著恩惠憐憫。
10 太監長給但以理講：「我驚畏我的主我的王，伊已經分派恁的飲食；豈可通互伊看見恁的面貌卡輸恁同年的少年人啊？若按呢，就互我的頭殼得保全佇王的面前。」
11 太監長有派一個監護者管理但以理、哈拿尼雅、米沙利、亞撒利雅，但以理對伊講：
12 「求你試看你諸個奴僕十日久，互阮食菜，飲水，
13 然後你通看阮的面貌及許個食王好物的少年人的面貌，就照你所看見的款待你諸個奴僕！」
14 此個事伊有允准𪜶，試𪜶十日久。
15 十日後，看見𪜶的面貌比許個食王的好物的少年人閣卡媠卡博。
16 對按呢監護就撤去所互𪜶的好物，所著飲的酒，互𪜶食菜。
17 此四個少年人，上帝互𪜶佇逐樣的文字學問聰明智識；但以理閣明白逐樣的異象及夢見的兆頭。
18 王所定著導𪜶入去的日已經到，太監長就導𪜶入去到尼布甲尼撒的面前。
19 王及𪜶講話，佇𪜶眾人的中間看無一個會比得但以理、哈拿尼雅、米沙利、亞撒利雅，所以𪜶得著徛佇王的面前。
20 王見有所問𪜶的事，就知𪜶的智慧聰明比通國的博士及術士贏過十倍。
21 但以理到古列王元年猶佇啲。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。