上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
47
對聖殿流出的水
伊導我倒轉到殿門，看啊，有水對殿的門椗下向東流出（因為殿的頭前向東）。諸個水對下面，對殿的正旁，祭壇的南旁流落。
2 伊就導我對北門出去，導我對外面彎到外門，對向東旁的門的路，看啊，水對正旁爆出來。
3 彼人手提繩索向東行出去的時，伊就量一千肘，教我對水過去，水淹腳目。
4 伊閣量一千，教我對水蹽過去，水淹腳頭窩；閣量一千，教我蹽過去，水淹到腰；
5 閣量一千，水就成做河，我𣍐會蹽過去。因為水漲淀，成做會泅得的水，𣍐蹽得的河。
6 伊就對我講：「人子啊，你有看見此個嗎？」
伊就導我互我越轉到河邊。
7 我倒轉去的時，看啊，佇河邊雙旁有樹木真多。
8 伊給我講：「諸個水向東流去，欲落到亞拉巴，直直流到海。所發出的水欲流入鹽海，海裡的水就變好。
9 河水所到的所在，逐樣生湠的動物攏欲得著活，也欲有魚真多，因為水流到遐，海裡的水變好。彼個河所流到的所在，所有的物攏欲得著活。
10 將來欲有討漁人徛佇岸邊，對隱‧基底到隱‧以革蓮，攏做拋網的所在。許個魚各照伊的類，親像大海的魚真多。
11 總是爛土的地及水汐的所在𣍐得著醫好，留啲出鹽。
12 佇河的雙旁邊欲發生逐類的樹木；通做食物，葉𣍐枯焦，果子出無斷。逐月日欲結新的果子，因為諸個水是對聖所流出的。樹頂的果子欲做食物，葉有醫治的功用。」
地界
13 主耶和華按呢講：「恁分此個地做業照以色列十二支派，伊的地界著親像下底。約瑟欲得著二份。
14 恁承接此個地做業，著相及平分；因為我曾攑起手應允將此個地互恁的列祖；此個地欲歸佇恁做業。
15 「地的界限就是按呢：北旁的界對大海去希特倫的路，直直到西達達出入的所在。
16 到哈馬、比羅他、西伯蓮（就是佇大馬色的境界及哈馬的境界的中間），到浩蘭邊界的哈撒‧哈提干。
17 對海的境界就是哈薩‧以難近佇大馬色的境界，閣佇北旁向北是哈抹的境界。這是北旁的界。
18 「東旁的界佇浩蘭、大馬色、基列，及以色列地的中間，就是約但河。恁著對北旁的界量到東海。這就是東勢的界。
19 「南旁向南的界是對他瑪到米利巴‧加低斯的水，續到埃及的溪，𥦁到大海。這是南旁向南的界。
20 「西旁的界就是大海，對南旁的境界直到哈馬出入對面的所在。這就是西旁的界。
21 「按呢恁著照以色列的支派為家己分此個地。
22 恁著拈鬮分此個地做業，歸佇恁本身及佇恁中間寄腳的出外人，就是佇恁中間生子查某子的。恁著看𪜶親像以色列家的中間所生者一樣；𪜶佇以色列支派的中間及恁相及得著地做業。
23 外面人徛起佇彼個支派的中間，恁就佇遐分地互伊做業。這就是主耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。