上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
43
耶和華倒轉聖殿
後來，伊導我到一個門，就是向東的門。
2 看啊，以色列上帝的榮光對東勢來。伊的聲親像多多水的聲；地就因為伊的榮耀來發出光。
3 伊的款式是親像我所看見的款式，就是我前來欲滅城的時所看見的款式，彼個異象也親像我佇迦巴魯河邊所看見的異像，我就仆落地。
4 耶和華的榮光對向東的門入佇殿內。
5 對按呢神就舉起我，帶我入內院，看啊，耶和華的榮光充滿殿內。
6 我聽見有一位對殿內向我講話。有一人徛佇我的身邊。
7 伊對我講：「人子啊，這是我寶座的所在，是我腳掌所踏的地。我欲佇遮，𫢶佇以色列人的中間到永遠。以色列家及𪜶的君王無欲閣用𪜶的淫行，以及𪜶的君王的身屍佇高的所在來拍垃墋我的聖名，
8 𪜶下𪜶的門椗近倚我的門椗，𪜶的門竪近倚我的門竪；𪜶及我的中間不過隔一叕牆；閣用𪜶所行可惡的事，拍垃墋我的聖名，所以我受氣來滅𪜶。
9 今𪜶著對我的面前除去𪜶的淫行及君王的身屍離開遠遠，我就𫢶佇𪜶的中間到永遠。
10 「人子啊，你著將此個殿指示以色列家，互𪜶因為家己的罪過來見誚；𪜶也著量殿的規模。
11 𪜶若為著家己一切所行的事來見誚，你著指示𪜶此個殿的模、及伊的款式、伊出的所在、伊入的所在，及伊一切的規模，伊一切的禮儀、伊一切的規模、伊一切的法度，攏寫佇𪜶的目睭前，互𪜶守一切的規模，一切的禮儀來行伊。
12 殿的法度就是按呢：佇山頂四圍的界內攏做至聖。看啊，這就是殿的法度。」
祭壇
13 以下是壇的量數，是用肘量伊（一個肘是一肘閣加一巴掌）。壇底一肘，闊一肘，四圍的墘有緣，高一巴掌，這就是壇的座。
14 對倚土腳的底座到下層的階，高二肘，闊一肘。對細階到大階，高四肘，闊一肘。
15 頂面的壇，有四肘。壇的頂面有凸四支角。
16 壇長十二肘，闊十二肘，款式四方。
17 四面的階長十四肘，闊十四肘。四圍的緣有半肘，伊的底座四圍一肘。伊的崎層向東。
奉獻祭壇
18 伊對我講：「人子啊，主耶和華按呢講：起造祭壇，為著欲佇彼頂面獻燒祭灑血，到造成的時伊的例親像下底：
19 主耶和華講，你著將一隻公的牛仔做贖罪的祭，交互祭司利未人撒督的後裔，就是許個親近我、服事我的。
20 你著取牛仔的血，抹佇壇的四角及階仔的四角，及四圍的緣。按呢來互伊清氣，閣為著伊贖罪。
21 你也著將彼隻做贖罪祭的牛仔燒佇聖所的外面，厝內定著的所在。
22 第二日，著將無瑕疵的山羊牨獻做贖罪的祭；𪜶欲清氣彼個壇，親像曾用公的牛仔清氣伊一樣。
23 你已經清氣伊，著獻一隻無瑕疵公的牛及羊群中一隻無瑕疵公的綿羊，
24 你著將諸個物獻佇耶和華的面前。祭司著用鹽摻佇𪜶頂面，獻互耶和華做燒祭。
25 七日內，每日你著備辦一隻公的山羊做贖罪的祭，𪜶也著備辦一隻公的牛仔及羊群中一隻公的綿羊，攏無瑕疵的。
26 歷過七日𪜶欲為壇贖罪，互伊清氣；按呢分別伊做聖。
27 許個日已經滿，對第八日以後，祭司欲佇壇頂獻恁的燒祭及平安的祭；我欲接納恁。這是主耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。