上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
39
歌革受拍敗
「人子啊，你著向歌革來宣傳攻擊伊，講主耶和華按呢講：羅施、米設、土巴的人君歌革啊，我及你做對敵。
2 我欲互你越轉，欲導你進前，互你對北方的極頭來，帶你到以色列的山。
3 我欲對你的倒手拍磕落你的弓，對你的正手拍落你的箭。
4 你及你的軍隊，以及及你來的列國人，欲倒佇以色列的山。我欲將你互逐樣的鷹鳥及田野的野獸做食物。
5 你欲倒佇田野，因為我曾講伊。這是主耶和華講的。
6 我也欲降落火佇瑪各及海嶼安然徛起的人的身上，𪜶就知我就是耶和華。
7 「我欲佇我的百姓以色列中顯出我的聖名，也無容允我的聖名閣受褻瀆，列國人就知我就是耶和華──以色列中的聖者。
8 主耶和華講：看啊，代誌來啦，也欲成伊，這是我所講的日。
9 「徛起以色列城的人欲出去起火燒伊的家私，就是大細的盾牌、弓箭、槌仔、及槍，攏欲用𪜶來燃火，歷過七年久，
10 甚至𪜶無欲對田野拾柴，也無欲對樹林剉樹；因為𪜶欲用家私燃火，閣欲搶許個搶𪜶的人，劫許個劫𪜶的人。這就是主耶和華講的。」
歌革的埋葬
11 「當彼日，我欲將以色列地，海的東勢，人所經過的山谷，賞賜歌革做塚地，阻擋經過的人的路。佇遐人欲埋葬歌革及伊的眾人，欲稱彼所在做哈們‧歌革的山谷。
12 以色列家欲埋葬𪜶歷過七月日的久，互彼個地清氣。
13 通國的百姓欲埋葬𪜶。當我得著榮光的日，此個事欲互𪜶得著名聲。這是主耶和華講的。
14 𪜶欲派人常常巡查遍地，及經過的人相及葬許個剩佇地裡的身屍，通清氣彼個地方。到七月日滿，𪜶欲閣四界尋。
15 巡查遍地的人欲經過，若有人看見人的骨骸，就佇遐立一個記號，聽候埋葬的人埋葬伊佇哈們‧歌革的山谷。
16 也欲有一個城名叫哈們那，𪜶欲按呢清氣彼個地。
17 「人子啊，主耶和華按呢講：你著對逐樣的飛鳥以及田野的野獸講：恁著聚集做陣來，著對四方聚集到我為著恁所獻的祭，就是以色列山的大祭，互恁通食肉、飲血。
18 恁欲食勇士的肉，飲地上首領的血、公的綿羊、羊仔、公的山羊、公的牛，攏是巴珊肥的精牲。
19 恁食我為著恁所獻的祭，欲食油到飽，飲血到醉。
20 恁欲佇我的桌食馬匹及坐車的，及勇士及一切的戰士到飽飽。這是主耶和華講的。」
以色列的復興
21 「我欲顯明我的榮光佇列國中；列國也欲看見我所行的審判及我所下佇𪜶身上的手。
22 按呢，對彼日以後，以色列家欲知我是耶和華──𪜶的上帝。
23 列國也欲知以色列家受掠是因為𪜶的罪過。𪜶得罪我，我對𪜶掩我的面，將𪜶交佇𪜶的對敵的手，𪜶就攏倒佇刀下。
24 我照𪜶的污穢照𪜶的過失款待𪜶，對𪜶掩我的面。」
25 所以主耶和華按呢講：「我欲互雅各受掠的人倒來，也欲憐憫以色列全家，
26 也欲為著我的聖名熱心。
27 𪜶佇本所在安然徛起，無人互𪜶驚，佇我將𪜶對列國中導倒來，對對敵的地聚集來。我佇列國的面前，佇𪜶身上顯明做聖的時，𪜶欲擔當𪜶的見誚及𪜶干犯我一切的罪。
28 我互𪜶受掠佇列邦，閣聚集𪜶倒來本所在，無留一人佇遐；𪜶就知我是𪜶的上帝──耶和華。
29 我也無閣對𪜶掩我的面，因為我已經將我的神降落佇以色列家。這是主耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。