上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
38
歌革──耶和華的工具
耶和華的話臨到我講：
2 「人子啊，你著面向瑪各地的歌革，就是羅施、米設、土巴的人君，宣傳來攻擊伊，
3 講主耶和華按呢講：羅施、米設、土巴的人君歌革啊，看啊，我做你的對敵。
4 我欲互你越轉，用鈎鈎你的牙槽，將你及你的軍兵、馬匹、馬兵帶出來，攏穿真媠的戰甲，成做大的軍隊，夯大小的盾牌，逐個攑刀劍。
5 波斯人、古實人，及弗人及𪜶來，逐個夯盾牌戴頭盔；
6 歌蔑及伊的軍隊，北方極頭的陀迦瑪族及伊的軍隊，閣有多多百姓及你做陣。
7 「你著家己備辦，你及聚集佇你遐的軍隊攏著備辦；你著做𪜶的元帥。
8 多多日後，你欲受辦理。到路尾的年，你欲來到脫離刀劍對列國收回的地，到以色列久久拋荒的山；總是伊已經對列國中帶出，𪜶攏欲安然徛起。
9 你及你的軍隊，以及及你相及來多多國的百姓，攏欲上來親像狂風來，你欲親像雲遮蓋地。」
10 主耶和華按呢講：「到彼日，欲有意思興起佇你的心，你欲圖謀歹的計謀，
11 講：『我欲上到鄉社的地，到靜靜安然徛起的百姓遐，𪜶所徛起的攏無城牆，也無門、無閂。
12 通搶所欲搶的，劫所欲劫的，越轉你的手攻擊許個前拋荒、今有人徛起的地，以及彼個徛起世界的中心點、對列國聚集、得著精牲貨財的百姓。』
13 示巴人、底但人、他施的生理人，及𪜶中間勇的獅攏欲對你講：『你來是欲搶所搶的嗎？你聚集你的軍隊是欲劫所劫的嗎？欲提金銀，帶精牲、貨財去嗎？欲大大搶所搶的嗎？』
14 「人子啊，你著因為按呢宣傳，對歌革講，主耶和華按呢講：當我的百姓以色列安然徛起的日，你豈無得著知嗎？
15 你欲對你的本所在，對北方的極頭來，你及多多國的百姓相及來，攏是騎馬，做大陣多多的軍隊。
16 你欲上來攻擊我的百姓以色列，親像密雲遮蓋地。佇路尾的日，我欲導你來攻擊我的地，歌革啊，到我佇列邦的面前，佇你的身上顯明做聖的時，通互𪜶識我。
17 主耶和華按呢講：我佇早時用我的奴僕以色列的先知所講的，就是你嗎？當許個日𪜶歷年讖語我欲導你來攻擊𪜶。」
上帝刑罰歌革
18 主耶和華講：「歌革上來攻擊以色列地的日，我的受氣欲對我的鼻孔出。
19 因為我怨妒及大受氣親像火就講：彼日佇以色列地的確有大振動，
20 甚至海中的魚、空中的飛鳥、田野的獸，以及地上一切啲趖的蟲𧒴，及地面上的眾人，佇我的面前攏欲振動；山嶺欲崩裂，山崁欲倒壞，牆壁攏欲倒落去。」
21 主耶和華講：「我欲命令我諸個山發出刀劍來攻擊歌革；逐人欲用伊的刀劍刣伊的兄弟。
22 我欲用瘟疫及流血來辦伊。我也欲用大雨、大雹及火，及硫磺降落互伊及伊的軍隊，以及及伊的眾百姓。
23 我欲顯明家己做大，顯明家己做聖，也欲顯現佇多多國人的面前；𪜶就知我就是耶和華。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。