上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
33
上帝指派以西結做守望者
( 3:16-21 )
耶和華的話臨到我講：
2 「人子啊，你著對本國的百姓講話，給𪜶講：我互刀劍臨到一國的時，彼一國的百姓對𪜶中間揀一人設立伊做守望的。
3 伊看見刀劍臨到彼所在，若歕哨角警戒眾百姓，
4 見若聽見哨角的聲，無受警戒者，刀劍若來剿滅伊，伊的罪欲歸佇伊的頭殼頂。
5 伊聽見哨角的聲，無受警戒，伊的罪欲歸佇伊本身；伊若受警戒，就會救家己的生命。
6 設使守望的人看見刀劍到，無歕哨角，致到百姓無受警戒，刀劍來刣死𪜶中間的一人，彼個人雖然死佇伊的罪，總是我欲對守望的人討伊失落生命的罪。
7 「人子啊，我按呢設立你做以色列家守望的人。所以你著聽我嘴內所講的話，替我警戒𪜶。
8 我對歹人講：『歹人啊，你的確會死！』你若無開嘴警戒歹人，互伊離開所行的路，此個歹人欲死佇伊的罪，總是我欲對你討伊失落生命的罪。
9 設使你警戒歹人越轉離開所行的路，伊猶原越轉離開，伊欲死佇伊的罪，你就會救你的活命。」
個人的責任
10 「人子啊，你著對以色列家講：『恁常常按呢講：阮的過失阮的罪惡佇阮的身上，阮是因為按呢漸漸消無，豈可會活啊？』
11 你著對𪜶講，主耶和華講：我指我的永活來咒誓，我斷斷無歡喜歹人死無，獨獨歡喜歹人越轉離開所行的路來活。以色列家啊，恁著越倒轉，離開歹路，恁啥事欲取死啊？
12 人子啊，你著對你的百姓講：義人的義，佇伊犯罪的日𣍐會救伊；論到歹人的歹，佇伊越轉離開伊的歹所行的日，亦𣍐會互伊跋倒；義人佇犯罪的日也𣍐會因為伊的義來得著活。
13 我對義人講：『伊的確活！』伊若倚靠伊的義來行歹，就伊所行的義攏無得著紀念。伊欲因為所行的歹來死。
14 閣，我對歹人講：『你的確死！』伊若越轉離開伊的罪，行正直及合理的事：
15 閣還人的當頭及所搶人的物，遵趁活命的律例，無閣做歹，伊的確活，無致到死。
16 伊所犯一切的罪無閣給伊記得。伊行正直及合理的事，的確會活。
17 「你的百姓猶啲講：『主的路無公平。』其實是𪜶的路無公平。
18 義人越轉離開伊的義來行歹，就欲因為按呢來死。
19 歹人越轉離開伊的歹，行正直及合理的事，就欲因為按呢來活。
20 恁猶啲講：『主的路無公平。』以色列家啊，我欲照恁逐人所行的審判恁。」
耶路撒冷陷落的消息
21 阮受掠的了後十二年十月初五，有一人對耶路撒冷逃走到我遮，講：「城已經攻破。」
22 逃走的人猶未到前一日的下昏，耶和華的手下佇我的身上，開我的嘴。到隔早起，彼人來到我遮，我的嘴就開，無閣啞口。
百姓的罪
23 耶和華的話臨到我講：
24 「人子啊，𫢶佇以色列荒廢的地的人啲講：『亞伯拉罕獨獨一人有得著此個地做業，咱人額真多，此個地是互咱做業的。』
25 所以你著給𪜶講，主耶和華按呢講：恁食猶有血的肉，閣攑起恁的目睭仰望恁的偶像，閣刣人流血，恁猶會得著此個地做業嗎？
26 恁倚靠恁的刀劍行可惡的事，人人拍垃墋厝邊的某，恁猶會得著此個地做業嗎？
27 你著對𪜶按呢講，主耶和華按呢講：我指我的永活來咒誓，佇拋荒的所在者，欲倒佇刀下；佇田野的中間者，我欲交𪜶互野獸吞食；佇衛所及洞內者，欲死佇瘟疫。
28 我欲互此個地冷靜，互人卬愕；伊因為勢力的驕傲也欲息。以色列諸個山攏欲冷靜，無人經過。
29 我因為𪜶所行一切可惡的事互地拋荒，致到人卬愕。彼時，𪜶就知我是耶和華。」
先知傳講信息的結果
30 「人子啊，你的百姓佇厝邊，佇厝門口談論你。兄弟對兄弟相及講：『來啊！來聽，聽看耶和華的話是講甚麼。』
31 𪜶來你遮親像百姓來聚會，坐佇你的面前親像是我的百姓。𪜶聽你的話亦無去行；因為𪜶的嘴顯出多多親愛，總是心是啲趇錢。
32 看啊，𪜶看你親像𠢕作樂、好聲音的人所唱的雅歌，𪜶聽你的話也無去行。
33 看啊，所講的話緊緊欲成；到成的時，𪜶就知曾有先知佇𪜶中間。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。