上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
27
哀悼推羅的哀歌
耶和華的話閣臨到我講：
2 「人子啊，著為推羅做哀歌，
3 給推羅講：你徛起海口，及列國眾海嶼買賣做生理。主耶和華按呢講：
推羅啊，你曾講：
我是完全媠者。
4 你的境界佇海中，
起造你的互你的媠完全。
5 𪜶用示尼珥的松樹做你一切的板，
用黎巴嫩的柏香樹做你的船桅，
6 用巴珊的橡樹做你的槳，
用基提海嶼的黃楊柴入象牙做你坐的板。
7 用埃及綉花的幼苧布做你的篷，
做你的旗；
用以利沙海嶼藍色、紫色的布做你的涼棚。
8 西頓及亞發徛起的百姓做你的划槳者。
你中間𠢕的人做你的按舵者。
9 迦巴勒老練者及𠢕的人，
攏佇恁中間做補船孔者；
一切過海的船隻及𪜶的水手
攏佇你中間經營生理的事。
10 「波斯、路德、弗的人佇你軍營中做戰士；𪜶佇你的中間𦊱盾牌及頭盔，顯明你的媠。
11 亞發人及你的軍隊攏佇你四圍的牆頂，你的守更樓亦有勇士；𪜶𦊱𪜶的盾牌佇你四圍的牆壁，成全你的媠。
12 「他施人因為逐樣的財物充足，就做你的客商，帶銀、鐵、錫、鉛，來換你的貨物。
13 雅完人、土巴人、米設人，攏及你交關；𪜶用人口及銅器來換你的貨物。
14 陀迦瑪族用馬及戰馬及騾來換你的貨物。
15 底但人及你交關，多多海嶼做你的下盤生理；𪜶帶象牙、黑木柴及你交換。
16 亞蘭人因為你的製造充足，就做你的客商；𪜶用綠寶石、紫色的布、綉花的物、幼苧布、珊瑚，紅寶石來換你的貨物。
17 猶大及以色列地的人攏及你交關；𪜶用米匿的麥、餅、蜜、油、乳香來換你的貨物。
18 大馬色人因為你的製造充足，閣因為逐樣的財物充足，就帶黑本的酒及白羊毛及你交關。
19 威但人及雅完人帶線及光的鐵、肉桂、菖浦，佇你的街市換你的貨物。
20 底但人用媠的馬鞍墊及你交關。
21 亞拉伯人及基達一切的領袖攏做你的下盤生理，用羊羔、公的綿羊、山羊及你交關。
22 示巴及拉瑪的生理人及你交關，𪜶用逐類上好的香料、逐類的寶石，及黃金來換你的貨物。
23 哈蘭、干尼、伊甸人、示巴的生理人、亞述人、基抹人及你交關。
24 諸個生理人用真好的貨物，藍色綉花的布裝歸包，閣有媠的衣服裝佇柏香柴的箱仔內，用索縛伊及你交關。
25 他施的船隻歸幫，給你載貨，
你就佇海中富有，極其榮光。
26 你的划槳的已經划你到大水的所在，
東風佇海中給你摃破。
27 你的錢財、你的物件、你的貨品、
你的水手、你的按舵者、
你的塞船孔者、你的經營生理者，
以及你中間的戰士及你中間的眾人，
佇你敗壞的日攏欲沈佇海中。
28 你按舵者喉叫的聲一下喝，
郊野攏欲振動。
29 見若划槳者及水手，
及一切過海按舵者，
攏欲離開船上岸。
30 𪜶欲為你開聲大哭，
摻土粉佇頭殼，
翱佇火灰中；
31 閣為著你來剃光頭，
用麻布縖腰，
痛心啼哭，
極其悲哀。
32 𪜶哀傷的時，
為著你做哀歌啼哭你，
講：有甚麼城親像推羅？
親像伊佇海中成做靜悽悽的啊？
33 你的貨物對海面上山，
就互多多百姓充足；
你用多多錢財、貨物，
互地上的君王好額。
34 你佇深水中互海湧撞破的時，
你的貨物及你中間一切的眾人，
就攏沈落去。
35 海嶼徛起的百姓為著你卬愕；
𪜶的君王攏真驚，
面帶憂容。
36 列國的生理人攏欲出譏刺的聲；
你互人通驚；
你無通閣佇啲直到永遠。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。