上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
22
耶路撒冷的過犯
耶和華的話閣臨到我講：
2 「人子啊，你欲審問，審問互人流血的城嗎？著互伊知伊一切可惡的事。
3 你著講，主耶和華按呢講：此個城有流人的血佇彼內面，互伊的日子到，閣妝偶像拍垃墋家己，陷害家己。
4 因為你互人流血，就有罪；你妝偶像，是拍垃墋家己，就你互你的日近，你已經到你的年。所以我互你受列國的凌辱，列邦的恥笑。
5 你此個臭名多多擾亂的城啊，許個離開你近、離開你遠者攏欲恥笑你。
6 「看啊，以色列的首領逐個逞伊氣力，佇你中間流人的血。
7 佇你中間有侮慢父母，佇你中間有壓制出外人，佇你中間有虧負孤兒寡婦者。
8 你看輕我的聖物，犯著我的安息日。
9 佇恁中間有誹謗人、欲互人流血者；佇恁中間有佇山頂食祭物，佇恁中間有行淫亂。
10 佇恁中間有露現老父的下體，佇恁中間有凌辱月經無清氣的婦仁人者。
11 有人及厝邊的某行可惡的事；也有人淫伊的媳婦來拍垃墋伊；佇恁中間亦有人凌辱伊的姊妹就是伊的老父的查某子。
12 佇恁中間有受賄賂來流人的血；你亦有提利錢討利息。你因為貪心，勒索厝邊得著財利，竟然𣍐記得我。這是主耶和華講的。
13 「看啊，我因為你所得不義的錢，及你中間所流的血，我就拍手。
14 到我辦你的日，你的心猶會忍受嗎？你的手猶會有力嗎？我──耶和華講此個話，就欲照按呢行。
15 我欲分散你佇列國，四散你佇列邦。我欲除你中間的污穢。
16 你欲佇列國人的面前，因為家己所行的受褻瀆，你就知我是耶和華。」
上帝的大火爐
17 耶和華的話臨到我講：
18 「人子啊，以色列家在我看是渣滓。𪜶攏是火爐中的銅、錫、鐵、鉛，是銀的渣滓。
19 所以主耶和華按呢講：因為恁攏成做渣滓，看啊，我欲聚集恁佇耶路撒冷的中間。
20 人怎樣將銀、銅、鐵、鉛、錫，聚集佇火爐中，牽火互伊鎔；按呢，我亦欲用我的受氣及大受氣，聚集恁下恁佇遐，來鎔化恁。
21 我欲聚集恁，用我大受氣的火歕恁，恁就佇彼中間鎔化。
22 銀怎樣鎔佇火爐中，恁亦欲按呢鎔佇彼中間，恁就知我──耶和華傾出我的大受氣佇恁的頂面。」
以色列領袖的罪惡
23 耶和華的話臨到我講：
24 「人子啊，你著對此個地講：你是未得著清氣的地，佇大受氣的日亦無落雨佇你遐。
25 伊中間的先知攏結黨，親像噤噤哮的獅抓著所搶的物。𪜶吞食人的神魂，搶人的貨財寶物，互𪜶的中間的守寡人閣卡多。
26 伊的祭司改斜我的律法，褻瀆我的聖所，無分別聖的及粗俗的，亦無互人分別無清氣的及清氣的，閣掩目睭看我諸個安息日；我亦佇𪜶中間受褻瀆。
27 伊的貴族親像豺狼抓著所搶的物，刣人流血，傷害人的生命，愛得著不義的錢。
28 伊的先知親像用灰水給𪜶筅白，看虛假的異像，用白賊給𪜶占卜，講：『主耶和華按呢講』，其實耶和華無影講。
29 國內的百姓一味行壓制，慣練搶人，虧負喪鄉困苦者，無情理欺壓出外人。
30 我佇𪜶中間尋看有一人通來圍牆，佇我的面前為著此個國徛佇破隙的所在，互我無剿滅伊，總是尋無一個。
31 所以我用我的痛恨傾佇𪜶的頂面，用我大受氣的火滅𪜶，照𪜶所行的報應佇𪜶的頭殼頂。這是主耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。