上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
21
耶和華的刀
耶和華的話臨到我講：
2 「人子啊，你著面向耶路撒冷向許個聖所傾出話，攻擊以色列地來宣傳。
3 對以色列地講，耶和華按呢講：看啊，我欲抵敵你，亦欲拔我的刀出伊的鞘，對你的中間剪除義人歹人。
4 我既然欲對你中間剪除義人及歹人，所以我的刀欲出伊的鞘，對南到北攻擊一切有血氣的；
5 一切有血氣的就知我──耶和華已經拔刀出伊的鞘，的確無閣收入。
6 人子啊，你著吐氣，腰骨折，痛苦吐氣，佇𪜶的面前。
7 𪜶問你講：『你啥事吐氣？』你就著講：『因為有風聲、代誌欲來。人的心攏欲消溶，手攏酸軟，精神衰敗，腳頭窩軟弱親像水。看啊，此個事啲來，的確會成。這是主耶和華講的。』」
8 耶和華的話臨到我講：
9 「人子啊，你著宣傳講。耶和華按呢講，你著講：
有刀、有刀，
是磨利鑢光的；
10 磨利是欲刣人，
鑢光是欲親像閃爁。
咱豈通歡喜嗎？我的子的枴仔藐視眾樹木。
11 此支刀已經交互人鑢光，通互人的手攑伊。伊已經磨利鑢光，通交佇刣人者的手。
12 人子啊，你著喝喉叫，因為此個臨到我的百姓及以色列一切的貴族。𪜶及我的百姓攏交佇刀下，所以你著搭大腿。
13 有試驗的事；若彼個藐視的枴仔歸佇無，欲按怎樣啊？這是主耶和華講的。
14 「人子啊，你著搭手宣傳。此支刀著三擺加倍，就是互人著重傷的刀，亦是互大人著重傷的刀，入佇密房者。
15 我備辦互人驚的刀，攻擊𪜶一切的城門，互𪜶的心消溶，加添𪜶跋倒的事。嗐啊，此支刀創到親像閃爁，磨到真利，欲刣死人。
16 你著合倚，向正旁，排陣向倒旁；出在你的面向叨落，就向遐。
17 我亦欲搭手，亦欲互我的大受氣息。這是我──耶和華講的。」
巴比倫王的刀
18 耶和華的話閣臨到我講：
19 「人子啊，你著為著本身設二條路，通互巴比倫王的刀劍對遐來。此二條路著對一所在分出，閣著畫一支手畫佇透到城的路頭。
20 你著設一條路，互刀來到亞捫人的拉巴；也通到猶大堅固的城耶路撒冷。
21 因為巴比倫王徛佇雙叉路遐，佇二條路頭欲占卜。伊的搖箭問偶像，驗牲禮的肝；
22 佇伊的正手有占卜去耶路撒冷的箭，設羊頭錘，開嘴喝刣，大聲喉叫，設羊頭錘，攻擊城門，起土堆造台。
23 許個曾對𪜶咒誓的人，看伊做假的占卜；總是伊欲互人記得𪜶的歹，致到𪜶眾人受掠。」
24 所以主耶和華按呢講：「因為恁的過失露現，互恁的罪過抵著記得，致到恁的罪惡佇恁的行做攏顯出；閣因為恁受記得，欲互人的手所掠，
25 你此個受重傷行歹的以色列王啊，你的罪惡貫滿，你的日子到啦。
26 主耶和華按呢講：著除去王帽，㨨冕旒，無閣有此號景況；今欲互低者升高，高者降低。
27 我欲捙倒，捙倒，捙倒伊；無閣有此個，聽候應該得著者到，我就互伊。」
刀及亞捫人
28 「人子啊，你著宣傳講：主耶和華論到亞捫人及𪜶的侮慢，有按呢講，你著講：有刀、有拔出的刀，已經鑢光，欲刣死人，互伊親像閃爁欲吞滅人。
29 人為著你看虛假的異象，行白賊的占卜，將你下佇受重傷歹人的頷頸。𪜶的罪惡貫滿，𪜶的日子到啦。
30 互刀入鞘！我欲佇你受造的位、生長的地，審判你。
31 我欲將我的痛恨傾佇你的身上，將我大受氣的火歕佇你；交你佇殘忍𠢕刣人者的手。
32 你欲做燃火的柴，你的血欲流佇此個地方，你無閣得著紀念；因為這是我──耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。