上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
10
耶和華的榮耀離開聖城
我觀看，看見𠼻𡀔兵頭殼頂穹蒼的中間，親像藍色的寶石，親像寶座的形像的款式。
2 伊對彼個穿幼苧衫的人講：「你入去，佇轉踅的輪的中間，𠼻𡀔兵以下，對𠼻𡀔兵的中間提𤏸的火炭滿二手，撒佇城頂。」
我就親目看見伊入去。
3 彼人入去的時，𠼻𡀔兵徛佇殿的正旁，雲充滿內院。
4 耶和華的榮光對𠼻𡀔兵遐上去，停佇殿的戶椗的頂面；殿有雲滿滿，彼個院亦互耶和華榮光的燦爛充滿。
5 𠼻𡀔兵的翅的聲聽到外院，親像全能的上帝講話的聲。
6 伊吩咐彼個穿幼苧衫的人講：「著對轉踅的輪的中間，𠼻𡀔兵的中間，取火。」彼時伊就入去徛佇一個輪的邊頭。
7 有一個𠼻𡀔兵對𠼻𡀔兵中伸伊的手，到𠼻𡀔兵中間的火，提寡起來，下佇穿幼苧衫的人的二支手，彼人給伊提來就出去。
8 佇𠼻𡀔兵的翅下，有顯出人的手的款。
9 我閣觀看，看見𠼻𡀔兵的邊頭四個輪。此個𠼻𡀔兵的邊頭有一個輪，彼個𠼻𡀔兵的邊頭也有一個輪；輪的款式親像黃的玉的色緻。
10 論到𪜶的款式，四個攏像一樣的形狀，親像輪中有輪。
11 行的時，四面攏會行直，行的時免越。頭向甚麼所在，𪜶就隨伊行，行的時免越。
12 𪜶通身軀，𪜶的尻脊，𪜶的手，𪜶的翅，及輪四圍有目睭滿滿。就是𪜶四個所有的輪。
13 論到諸個輪，我耳孔中聽見講轉踅者。
14 逐個有四個面：頭一個面是𠼻𡀔兵的面，第二個面是人的面，第三個面是獅的面，第四個面是鷹的面。
15 𠼻𡀔兵攏上去；這是我佇迦巴魯河邊所曾看見的活物。
16 𠼻𡀔兵行，輪亦佇邊頭行。𠼻𡀔兵展開翅，對地上去，輪也無越轉離開𪜶的身邊。
17 許個停，諸個也停；許個上去，諸個也相及上去；因為活物的神佇𪜶的內面。
18 耶和華的榮光對殿的戶椗頂出去，停佇𠼻𡀔兵的頂面。
19 𠼻𡀔兵出去的時，就展開翅，佇我的目睭前對地上去。輪亦佇𪜶的身邊，停佇耶和華的厝東門的門口。佇𪜶的頂面有以色列上帝的榮光。
20 這是我前佇迦巴魯河邊所看見、以色列上帝的下面的活物，我知𪜶是𠼻𡀔兵。
21 逐個有四個面，逐個有四個翅，𪜶的翅下有人的手的形像。
22 論到𪜶的面的形像，就是我前佇迦巴魯河邊所看見的面。𪜶的款式，𪜶的身體攏按呢，攏逐個直直行去。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。