上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米哀歌
2
耶和華刑罰耶路撒冷
唉啊！主受氣，互黑雲遮蓋錫安的查某子！
伊將以色列的媠對天㧒落地；
佇伊受氣的日亦無念著伊的腳踏椅。
2 主𧿬踏雅各一切徛起的所在，亦無憐憫。
伊受氣捙倒猶大查某子的衛所，
互伊倒到平地；
伊凌辱此國及伊的貴族。
3 伊的受氣真烈，一盡斬斷以色列的角，
佇對敵的面前勼伊的正手。
伊親像四圍吞滅的火焰，將雅各燒燎去。
4 伊開弓親像對敵；
伊徛啲攑起正手，
親像仇讎，亦一盡剿滅目睭所歡喜者。
佇錫安查某子的布棚
傾出伊的大受氣，親像火一樣。
5 主變做親像對敵吞滅以色列，伊吞滅一切伊的宮殿，
伊毀壞伊許個衛所；
佇猶大查某子的中間加添多多悲傷及悲哀。
6 伊出力拆毀伊的籬笆，
親像花園，
伊毀壞伊聚會的所在。
所定著的節期及安息日佇錫安攏𣍐記得，耶和華互伊按呢，
閣佇伊的受氣痛恨中看輕君王及祭司。
7 主棄拺伊的祭壇，
厭惡伊的聖所，
將伊的宮殿的牆交佇對敵的手。
𪜶佇耶和華的厝嘩嘩哮，
親像佇節期的日一樣。
8 錫安查某子的城牆耶和華決意欲拆毀；
伊牽繩線，
直直毀滅，手無勼倒轉。
伊互外牆及城牆攏悲哀，
做一下衰敗。
9 伊的門沈落地；
主毀壞、遏折伊的門楗。
伊的君王及貴族住佇無法律的列國中；
伊的先知無得著耶和華的啟示。
10 錫安查某子的長老坐佇土腳靜靜無聲；
用土粉摻頭殼，用麻布縖腰；
耶路撒冷的在室女頭殼扼落地。
11 我的目睭流目屎，致到煙暈；
我的心腸攪絞，我的肝膽墜落地，
因為我的百姓的查某子抵著毀滅，
閣因為囝仔及食奶的佇城內的街路昏去。
12 𪜶佇城內街路昏去，親像受傷者，
佇老母的心懷，氣欲斷；
彼時對老母講：五榖及酒佇叨落？
13 耶路撒冷的查某子啊，我欲怎樣為你做干證？
我欲用甚麼譬喻你啊？
錫安的在室女啊，我欲用甚麼比並你，互你得著安慰啊？
因為你的傷嘴大親像海，
是誰會醫好你啊？
14 你的先知替你看虛假及愚戇的異象，
無顯出你的罪過，
通互你受掠者倒轉來；
獨獨替你看虛假的啟示
及受遷徙的因端若定。
15 見若過路人攏給你拍噗仔。
𪜶向耶路撒冷的查某子恥笑，搖頭，講：
此個城豈是人所稱十足媠，
做全地所歡喜的嗎？
16 你的對敵攏向你大大開伊的嘴；
𪜶恥笑，閣咬齒講：
阮有吞滅伊。
這真正是阮所向望的日，今阮有抵著，
阮有看見！
17 耶和華有成伊所定著，
應驗伊早時所命令的話。
伊捙倒，亦無保惜，
互對敵對你大悅；
互你的對敵的角攑高。
18 𪜶的心求叫主。
錫安查某子的牆啊，你著暝日流目屎親像溪，
你通歇睏；
你的目睭仁著流目屎無息。
19 暝間，換更的時著起來求叫，
佇主的面前傾出你的心親像水。
你的囝仔佇街市口因為枵昏去；
你著為著𪜶的生命向主攑手來祈禱。
20 耶和華啊，求你鑑察！
看你向是誰按呢行？
婦仁人豈通食𪜶所生的、手所抱的嬰仔嗎？
祭司及先知豈通佇主的聖所受刣嗎？
21 囝仔及老人倒佇街路的土腳；
我諸個在室女及壯丁倒佇刀下；
你受氣的日刣死𪜶。
你刣死𪜶，亦無憐憫。
22 你叫四圍通驚惶者到佇我，
親像佇節期的日。
佇耶和華受氣的日，
無人有脫離，亦無人留啲。
我所抱所育者，對敵給伊刣死了了。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。