上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
49
耶和華審判亞捫
論亞捫。耶和華按呢講：
以色列無子嗎？
無後嗣嗎？
瑪勒堪怎樣得著迦得的地做業？
伊的百姓怎樣徛起伊中間許個城？
2 耶和華講，
看啊，日子欲到，我欲互交戰的聲，
聽佇亞捫族的拉巴，
伊欲成做拋荒的土堆；
伊諸個城欲互火燒，
前佔以色列者，
今欲互以色列佔倒轉。
這是耶和華講的。
3 希實本啊，你著哀哭，
因為崕的城變做拋荒。
拉巴的百姓啊，著喉叫，
用麻布縖腰；
著啼哭，行來行去佇籬笆中；
因為瑪勒堪及伊的祭司、
貴族欲做一下互人掠去。
4 悖逆的百姓啊，
恁啥事因為許個山谷，
就是水潤澤的山谷來誇口啊！
你倚靠財寶講：
是誰會來到阮遮。
5 主──萬軍的耶和華按呢講：
看啊，我欲互驚惶對四圍臨到恁，
恁欲受趕出，
逐人直直去，
走無路的無人通聚集。
6 總是後來我欲互亞捫族受掠的人倒轉。
這是耶和華講的。
耶和華審判以東
7 論以東。萬軍的耶和華按呢講：
佇提幔無閣有智慧嗎？
聰明的人無閣有計劃嗎？
𪜶的智慧無去嗎？
8 底但的百姓啊，退去啊，逃走啊，
匿去密啊；
因為我刑罰以掃的時，
欲互伊的災禍到佇伊。
9 挽葡萄者若到你遐挽，
豈無猶留幾粒仔嗎？
賊若暝時來，
豈是損斷到滿意若定？
10 總是我互以掃光溜溜，
露現伊囥密的所在，
致到無地通匿。
伊的後裔，伊的兄弟，伊的厝邊攏失敗；
伊亦歸佇無。
11 著將你無父的子放下啲，我欲保全𪜶活；
你諸個寡婦，亦著倚靠我。
12 因為耶和華按呢講：「看啊，本應該飲彼個杯者，的確欲飲伊。莫卻你，你豈會一盡免刑罰嗎？你的確𣍐免得刑罰，你的確著飲伊！」
13 耶和華講：「我指家己來咒誓，波斯拉欲成做通卬愕、通凌辱、通咒詛、閣荒廢。伊攏總的城欲永遠變做拋荒。」
14 我對耶和華遐聽見消息，
亦有使者奉差去列國，講：
恁著聚集來攻擊伊，著起來交戰。
15 因為我互你佇列國中做微細，互人看輕。
16 徛起石洞內把守山頂者啊，
你的威風你心內的驕傲家己騙；
你雖然親像鷹鳥作你的巢佇高的所在，
我欲對遐給你取落來。
這是耶和華講的。
17 「以東欲成做通卬愕的；見若對遐過者的確欲奇怪，因為伊所抵著一切的災禍來恥笑伊。
18 耶和華講：的確無人徛起佇遐，亦無人寄腳佇遐，是欲親像所多瑪、蛾摩拉，及附近的城倒壞一樣。
19 看啊，伊欲親像獅對約但河邊的樹林起來，攻擊堅固徛起的所在。目𥍉久，我欲互𪜶逃走，離開此個所在。是誰受揀選，我就派伊治理此個地。是誰會比得我？是誰會給我定一個期啊？有甚麼牧者會徛佇我的面前啊？
20 所以恁著聽耶和華所計劃攻擊以東的計策以及伊所註定攻擊提幔徛起的百姓的旨意。𪜶定著欲將許個羊群的細者拖去，伊亦欲互𪜶徛起的所在荒廢。
21 因為𪜶倒壞的聲，地就振動。𪜶喉叫的聲聽到紅海。
22 看啊，伊欲起來，親像鷹鳥飛來，展開伊的翅佇波斯拉。到彼日，以東諸個勇士的心，親像欲生子的婦仁人的心。」
耶和華審判大馬色
23 論大馬色。
哈馬及亞珥拔見誚，
因為𪜶聽見歹消息就失膽。
海面有憂愁，𣍐平靜。
24 大馬色衰弱，越轉身欲逃走。
愕愕惙將伊掠住住；
痛苦憂愁將伊搝住住，
親像欲生子的婦仁人一樣。
25 通謳咾的城就是我所歡喜的城，
怎樣受放拺到按呢？
26 伊的少年人欲佇伊的街市倒落去；
當彼日，伊一切的兵丁欲滅無。
這是萬軍的耶和華講的。
27 我亦欲互火𤏸佇大馬色的城牆，
燒滅便‧哈達的宮殿。
審判基達及夏瑣城
28 論基達及夏瑣諸個國就是巴比倫王尼布甲尼撒所拍的。耶和華按呢講：
你起來，上去基達，
剿滅東方的人。
29 𪜶的布棚及羊群人欲搶去，
將帳幅及一切的器具，及駱駝搶做家己的。
人對𪜶喝講：
四圍攏有驚惶。
30 耶和華講：
夏瑣徛起的百姓啊，著逃走，
走去遠，匿去密；
因為巴比倫王尼布甲尼撒設計欲害恁，
定著意思欲攻擊恁。
31 耶和華講：
起來！上去攻擊安然徛起無掛慮的族；
𪜶無門戶無門閂、是家己徛起者。
32 𪜶的駱駝欲互人搶去；
𪜶多多精牲欲互人劫去。
見若剃鬢邊者欲趕散𪜶佇四方，
互災禍對四圍到佇𪜶。
這是耶和華講的。
33 夏瑣欲成做野狗𫢶的所在，
永遠凄凊，
無人佇遐徛起，
亦無人佇遐寄腳。
耶和華審判以攔
34 猶大王西底家起頭坐位的時，耶和華論以攔的話臨到先知耶利米講：
35 「萬軍的耶和華按呢講：看啊，我欲遏折以攔人的弓，就是𪜶上等的氣力。
36 我欲互四面的風對天的四面吹來，臨到以攔人，將𪜶趕散佇四方。以攔受趕散的人無一國無到。」
37 耶和華講：「我欲互以攔人佇對敵的面前及數想𪜶的生命的人的面前來驚惶；我也欲互災禍，就是我的大受氣臨到𪜶，閣欲互刀劍追趇𪜶，到一盡滅𪜶。
38 我欲設立我的寶座佇以攔，對遐除去君王及貴族。這是耶和華講的。
39 「總是到日後，我欲互以攔受掠的人倒來。這是耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。