上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
48
摩押的毀滅
論摩押。萬軍的耶和華──以色列的上帝按呢講：
尼波有災禍啊！因為受毀壞。
基列亭抵著見誚受取；
米斯迦抵著見誚受敗壞；
2 摩押無閣受謳咾。
有人佇希實本設計謀欲害伊，講：
來啦！咱給伊剪除，互伊無閣成做國。
瑪得緬啊，你亦著靜靜無做聲；
刀劍欲追趕你。
3 對何羅念有喉叫的聲有搶劫及大的毀滅：
4 摩押抵著毀滅！
伊的囝仔哮的聲，互人聽見。
5 因為人絔上魯希的山坪愈行愈哭，
落何羅念的山坪聽見毀滅哀哭的聲。
6 恁著逃走，家己救生命，
親像曠野的杜松。
7 你因為倚靠家己的所做及家己的財寶亦欲受掠。
基抹及屬伊的祭司貴族，亦欲做一下受遷移。
8 行毀滅者欲到逐個城，
無一個城會免得。
山谷欲致到敗落，
平洋欲受毀壞；
照耶和華所講的。
9 著用翅互摩押，
互伊飛走。
伊諸個城欲致到拋荒，
無人徛起。
（
10 凊凊彩彩做耶和華的工者，著受咒詛；禁止伊的刀染著血者，著受咒詛。）
摩押的城受毀滅
11 摩押對少年以來常常享受平安，
親像坐清的酒，
無對此個器具傾佇別個器具，
亦未曾受掠。
因為按呢，伊的原味猶佇啲，
氣味未變。
12 耶和華講：「看啊，日子欲到，我欲差傾酒者去伊遐，給伊傾出來，傾空伊的器具，拍破伊的酒甕。
13 摩押欲為著基抹來見誚，親像以色列家為著𪜶所倚靠的伯特利來見誚一樣。
14 你怎樣講：
阮是勇士，是有力通交戰的人？
15 摩押變做拋荒，
對敵上去，入伊許個城。
所揀選的少年人落去抵著刣死；
這是君王──名做萬軍的耶和華講的。
16 摩押的災禍近啦；
伊的患難緊緊到。
17 見若佇伊的周圍識伊的名者，
恁攏著為伊悲傷，講：
彼個勇的槌，媠的枴仔，
豈會折到按呢？
18 住佇底本的百姓啊，
著對你榮光的位落來，
坐佇乾燥的地；
因為毀滅摩押者上來攻擊你，
毀壞你許個衛所。
19 住佇亞羅珥的啊，
著徛佇路邊觀看，
問逃走的查甫人，及脫離的婦仁人講：
是甚麼代誌啊？
20 摩押因為毀壞來見誚；
恁著啼哭喉叫，
著佇亞嫩報告講：
摩押變做拋荒！
21 「刑罰已經到佇平洋的地佇何倫、佇雅雜、佇米法押、
22 佇底本、佇尼波、佇伯‧低比拉太音、
23 佇基列亭、佇伯‧迦末、佇伯‧米恩、
24 佇加略、佇波斯拉，及摩押地遠近所有的城。
25 摩押的角剉斷啦，伊的手骨遏折啦。這是耶和華講的。」
摩押欲受凌辱
26 「恁著互摩押酒醉，因為伊自高悖逆耶和華。伊欲佇伊所吐的中間翱來翱去，閣欲互人恥笑。
27 以色列豈曾互你恥笑嗎？伊豈是佇賊的中間互人查出嗎？因為你逐擺講起伊的時，就搖頭拂耳。
28 徛起佇摩押的啊，
恁著離開諸個城，徛起佇石磐，
親像鳩鵻作巢佇孔口的邊。
29 阮有聽見摩押的驕傲，
伊的驕傲到極；
伊的自高，伊的驕傲，
伊的侮慢，存心家己掠做大。
30 耶和華講：
我知伊的受氣，
及伊空空的誇口，所行是空空。
31 因為按呢，我欲為著摩押啼哭，
我欲為著摩押全地喉叫；
𪜶欲為著吉珥‧哈列設的人吐氣。
32 西比瑪的葡萄樹啊，我為著你啼哭，
比雅謝人的啼哭卡傷重。
你的枝湠過海，
直直伸到雅謝的海。
彼個行毀滅者已經臨到你欲收成的果子，
及你的葡萄。
33 肥的田及摩押地，伊的歡喜快樂攏無去；
我互酒窟的酒無去，
無人踏酒出歡喜的聲；
彼個聲是歡喜的聲。
34 「因為希實本哀傷的聲𥦁到以利亞利，直直到雅雜；閣對瑣珥到何羅念，直到伊基拉‧施利施亞，因為寧林的水的確枯焦。」
35 耶和華講：「我欲佇摩押地互彼個獻祭佇山頭壇者，及彼個燒香佇伊許個神明者攏息。
36 因為按呢，我的心為著摩押親像𥰔簫啲鳴，我的心為著吉珥‧哈列設人親像𥰔簫啲鳴，因為𪜶所聚集的財物攏無去。
37 「頭殼逐個光裸裸，嘴鬚逐個剪短短，手骨逐個割傷，腰縖麻布。
38 佇摩押逐間的厝頂及伊許個街市逐所在有啼哭；因為我攻破摩押，親像摃破中意的器具。這是耶和華講的。
39 伊毀壞到按呢！𪜶啼哭到按呢！摩押見誚越倒轉到按呢！親像按呢摩押欲互四圍的人恥笑卬愕。」
摩押無路通走
40 因為耶和華按呢講：
看啊，伊欲親像鷹鳥飛來，
展開伊的翅佇摩押。
41 迦略互人取去，許個衛所互人佔去。
到彼日，摩押諸個勇士的心親像欲生子的婦仁人的心。
42 摩押欲抵著毀滅，無閣成做國，
因為𪜶自高悖逆耶和華。
43 耶和華講：摩押徛起的百姓啊，
驚惶、陷坑、活罩攏到佇你。
44 走避驚惶的欲跋落陷坑；
對陷坑絔起來的欲互活罩罩著，
因為我欲互刑罰的年臨到摩押。
這是耶和華講的。
45 許個逃走者氣力盡，徛佇希實本蔭影下；
總是火對希實本出，火焰對西宏發，
一盡燒摩押的邊界，及作亂的人頭殼的頂面。
46 摩押啊，你有災禍！
基抹的百姓滅無啦！
你的眾子互人掠去，
你的眾查某子做受掠者。
47 耶和華講：
總是到日後，我欲互摩押受掠的人倒轉。
論摩押受審判的話到遮為止。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。