上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
46
埃及佇迦基米施受拍敗
耶和華的話臨到先知耶利米論起列國的事。
2 論埃及是論埃及王法老尼哥的軍兵：紮營佇伯拉河邊的迦基米施，當猶大王約西亞的子約雅敬四年互巴比倫王尼布甲尼撒所拍敗者。
3 恁著備辦大小的盾牌，
去交戰。
4 恁著套馬，騎馬！
戴盔徛起來，
磨槍穿戰甲！
5 我啥事看見按呢？𪜶驚惶退後；
𪜶的勇士刣輸，
緊緊走，無越頭；
四周圍有驚惶！
這是耶和華講的。
6 𠢕走的走𣍐離；
勇士𣍐會脫離；
佇北方伯拉河邊𪜶攏著觸跋倒。
7 此個親像尼羅河漲滿，
親像江河的水夯湧者是是誰啊？
8 埃及親像尼羅河漲滿，
伊的水親像江河夯湧。
伊的話講：我欲淐高我欲遮蓋遍地；
我欲毀壞城及其中徛起的百姓。
9 馬著緊上來！
車著亂亂走！
勇士著出來，古實及弗的人攏夯盾牌，
路德的人𠢕開弓。
10 因為彼日是主──萬軍的耶和華的日，
報讎的日，
通對伊的對敵報讎。
刀劍欲吞食到飽，
飲血到醉；
因為主──萬軍的耶和華，
佇北方伯拉河邊有獻祭的事。
11 埃及的百姓啊，
著上去基列來取乳香；
你用多多藥，
是空空，你𣍐得著醫好。
12 列邦聽見你的凌辱，
遍地攏是你哀哭的聲；
因為勇士及勇士相磕，
做一下跋倒。
尼布甲尼撒來攻擊
13 耶和華對先知耶利米所講的話，論到巴比倫王尼布甲尼撒欲到，來攻擊埃及地：
14 恁著報揚佇埃及，宣佈佇密奪，
宣佈佇羅弗及答比匿講：
著排隊，家己備辦，
因為刀劍佇你的四圍啲吞滅。
15 你的大力者怎樣跋倒？
𪜶徛𣍐在；
因為耶和華趕𪜶，
16 伊互多多人跋倒；
大家倒相褡，𪜶就講：
起來！咱倒來去本族到咱本所在，
來閃避壓制咱的刀劍。
17 𪜶佇遐叫講：
埃及王法老不過是一個聲；
伊有拍損伊的機會。
18 大君王──伊的名萬軍的耶和華講：
我指我的活命來咒誓：
伊欲來親像山中的他泊，
親像海邊的迦密。
19 徛起佇埃及的百姓啊，
你著備辦受掠應用的物件，
因為羅弗欲拋荒，
燒毀，無人徛起。
20 埃及是媠的牛種仔；
獨獨對北方出的毀滅來啦！
來啦！
21 其中雇倩的兵親像內肥的牛仔，
𪜶越轉身做一下走，徛𣍐住；
因為𪜶抵著患難的日，
受刑罰的時已經到啦。
22 伊的聲親像蛇啲行。
對敵欲歸陣來，𪜶欲攑斧頭來攻擊伊親像剉樹的人一樣。
23 耶和華講：
伊的樹林雖然真密，
𪜶亦欲剉伊，
因為𪜶比草蜢卡多，𣍐會算得。
24 埃及的百姓欲見誚，
欲交佇北方的百姓的手。
25 萬軍的耶和華──以色列的上帝講：「看啊，我欲刑罰屬佇羅的亞捫及法老，及埃及及伊的神明，及伊的君王，亦欲刑罰法老以及倚靠伊的人。
26 我欲將𪜶交佇數想𪜶的生命的人的手，及巴比倫王尼布甲尼撒的手及伊的人臣的手；以後埃及的確閣有人徛起，及早前一樣。這是耶和華講的。」
耶和華欲救伊的百姓
27 我的奴僕雅各啊，你莫得驚！
以色列啊，莫得驚惶！
看啊，我欲對遠遠的所在拯救你，
對受掠去的地拯救你的後裔。
雅各欲倒來，得著安靜平安，
無人互伊驚惶。
28 我的奴僕雅各啊，莫得驚惶！
因為我及你佇啲。
亦欲將我所趕你到許個國一盡剿滅，
總是無一盡剿滅你，
欲照所合宜的責備你，
斷斷𣍐會無刑罰你。
這是耶和華講的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。