上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
16
嗎哪及鵪鶉
𪜶對以琳起身，佇出埃及地以後第二月十五日，以色列人全會到以琳及西奈的中間、汛的曠野。
2 以色列人全會佇曠野哀怨摩西、亞倫，
3 以色列人對𪜶講：「值著阮佇埃及地、死佇耶和華的手；彼時阮有肉滿鼎，有餅通食夠飽。恁導阮出來，到此個曠野，是欲互此個全會攏餓死！」
4 耶和華對摩西講：「看啊！我欲對天落米糧互恁。百姓著出去，逐日拾逐日的額，我通試驗𪜶，看𪜶欲趁我的法度抑。
5 到第六日，𪜶著將所拾入來的備辦好勢，比逐日所拾的重倍多。」
6 摩西、亞倫對以色列眾人講：「到下昏，恁欲知導恁出埃及地的是耶和華。
7 明仔早起，恁欲看見耶和華的榮光，因為耶和華聽見恁哀怨伊。阮算甚麼，恁竟然哀怨阮？」
8 摩西閣講：「耶和華下昏時欲互恁食肉，早起時欲互恁食餅到飽；因為恁哀怨耶和華，伊攏聽見。阮算甚麼，恁是哀怨阮，是哀怨耶和華。」
9 摩西對亞倫講：「你著給以色列人全會講：『恁著就近耶和華的面前，因為伊已經聽見恁的哀怨啦。』」
10 亞倫抵抵對以色列人全會講話的時，𪜶向曠野啲看，看啊，耶和華的榮光佇雲中顯現。
11 耶和華對摩西講：
12 「我已經聽見以色列人的哀怨。你著給𪜶講：『到黃昏的時，恁欲食肉，早起欲有餅通食飽，恁就知我是耶和華──恁的上帝。』」
13 到下昏，有鵪鶉飛來，遮蓋營盤；天光早佇營盤四圍的地面，有一重的露水。
14 露水乾的時，看啊，曠野的地面有細細圓圓的物，細到親像霜。
15 以色列人看見，知是甚麼，大家相及講：「這是甚麼啊？」摩西給𪜶講：「這就是耶和華互恁食的餅。
16 耶和華所吩咐的是按呢：恁著照逐人所會食的量來拾，逐人為伊布棚內的人，照伊的人額來拾，一人一俄梅珥。」
17 以色列人照按呢行；有的拾多，有的拾少。
18 到用俄梅珥量伊，拾多的無剩，拾少的也無欠；逐人照𪜶會食的量來拾伊。
19 摩西給𪜶講：「人通將所剩的，留到過早起。」
20 總是𪜶無聽摩西的話，有人留到過早起，就生蟲臭味；摩西受氣𪜶。
21 𪜶逐早起，照逐人會食的量拾伊，日頭一下曝，就溶去。
22 到第六日，𪜶拾重倍的額，逐人二俄梅珥。全會許個頭人來給摩西講；
23 摩西給𪜶講：「耶和華按呢講：『明仔日是重要的安息，就是服事耶和華聖的安息日。恁愛煏的就煏伊，愛煮的就煮伊，所剩的著家己收啲留到過早起。』」
24 𪜶就照摩西所吩咐收啲留到過早起，也無臭味，內面也無蟲。
25 摩西講：「恁今仔日食此個！因為今仔日是服事耶和華的安息日；恁佇田野今仔日的確尋無。
26 六日間通拾，第七日是安息日，彼日就無。」
27 第七日，百姓中有人出去拾，也尋無。
28 耶和華對摩西講：「恁肯守我的命令、我的律法，欲到底時啊？
29 恁著看！耶和華已經將安息日賞賜恁，所以第六日伊互恁二日的米糧，第七日逐人著𫢶家己的所在，攏通出去。」
30 對按呢百姓就佇第七日安息。
31 此個物，以色列家叫伊做嗎哪；款式親像芫荽仁，色緻是白的，滋味親像參蜜的餅。
32 摩西講：「耶和華按呢吩咐：『著將一俄梅珥淀淀的嗎哪留到恁的後代，互𪜶看我當日導恁出埃及地，佇曠野所互恁食的餅。』」
33 摩西給亞倫講：「你提一個器具，貯一俄梅珥淀淀的嗎哪，囥佇耶和華的面前，留到恁的後代。」
34 亞倫照耶和華所吩咐摩西的，將嗎哪下佇干證的約櫃前留啲。
35 以色列人食嗎哪共四十年久，直到𪜶到佇有人徛起的地，𪜶食嗎哪直到𪜶到迦南的境界。
36 一俄梅珥就是伊法的十份一。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。