上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
25
對北方來的對敵
當猶大王約西亞的子約雅敬的四年，就是巴比倫王尼布甲尼撒元年，有論起猶大百姓的話臨到耶利米。
2 先知耶利米就將此個話對猶大眾百姓以及一切徛起耶路撒冷的人講：
3 「對猶大王亞們的子約西亞十三年到今，二十三年久，有耶和華的話臨到我；我已經對恁講，閣早早起來講，獨獨恁聽。
4 耶和華也早早起來，差伊的奴僕眾先知到恁遮（若是恁無聽趁，亦無俯耳孔來聽），
5 伊講：『恁逐人著越頭，離開伊的歹路及恁所做的歹，就通徛起耶和華所賞賜恁及恁的列祖的地，對古早到永遠。
6 通趁別號的上帝服事跪拜𪜶，通用恁的手所做的來惹我的受氣；按呢，我就無降災禍互恁。
7 總是恁無聽趁我，竟然用手所做的惹我的受氣，陷害家己。這是耶和華講的。』」
8 所以萬軍的耶和華按呢講：「因為恁無聽趁我的話，
9 看啊，我欲召北方諸個族，及我的奴僕巴比倫王尼布甲尼撒，來攻擊此所在及此所在徛起的百姓，以及四圍的列邦。我欲一盡剿滅𪜶，互𪜶做通卬愕、通譏刺，永遠拋荒的所在。這是耶和華講的。
10 閣𪜶中間歡喜的聲快樂的聲，新子婿的聲新娘的聲，挨磨的聲及燈的光，我欲互𪜶攏息。
11 全地的確拋荒，互人卬愕。諸個列邦欲服事巴比倫王七十年。
12 七十年已經滿，我欲刑罰巴比倫王及伊的國的罪，閣互迦勒底人的地永遠拋荒。這是耶和華講的。
13 我欲用我所講攻擊彼個地的事，攏到佇𪜶，就是見若記佇此本冊，耶利米所論起諸個國所讖語的。
14 因為有多多國及大的君王欲用𪜶迦勒底人做奴僕；我亦欲照𪜶的所行，及𪜶的手所做的，報應𪜶。」
上帝審判列國
15 耶和華──以色列的上帝對我按呢講：「你對我的手接此杯受氣的酒，互我所差你去的列國飲。
16 𪜶飲了就顛顛倒倒，亦欲發狂，因為我互刀劍到𪜶中間。」
17 我就對耶和華的手接此個杯，互耶和華所差我去的列國飲伊，
18 就是耶路撒冷及猶大諸個城，以及𪜶的列王貴族，互𪜶拋荒，做通卬愕、通譏刺、通咒詛的，親像今仔日一樣。
19 閣埃及王法老及伊的人臣、貴族、眾百姓，
20 及相參插的百姓，烏斯地諸個王，非利士地諸個王（亞實基倫、迦薩、以革倫，以及亞實突所剩的人）；
21 閣以東、摩押、及亞捫的後裔、
22 推羅列王、西頓列王、海外的海嶼的列王、
23 底但、提瑪、布斯、及一切剃鬢邊者；
24 亞拉伯的列王、𫢶佇曠野相參插的百姓的列王、
25 心利的列王、以攔的列王、米太的列王、
26 北方遠近的列王，此個彼個，以及天下萬國飲伊，以後示沙克王亦欲飲伊。
27 「你著給𪜶講：『萬軍的耶和華──以色列的上帝按呢講：恁著飲，來醉，來吐，來跋倒，無閣起來，因為我互刀劍到恁中間。』
28 「𪜶若肯對你的手接此個杯去飲，你就著給𪜶講：『萬軍的耶和華按呢講：恁決斷著飲！
29 因為我降災禍對彼個用我的名來稱的城起手，恁會一盡免刑罰嗎？的確𣍐免得，因為我欲命令刀劍臨到地上攏總的百姓。這是萬軍的耶和華講的。』
30 「所以你著對𪜶宣傳這一切的話，來攻擊𪜶，講：
耶和華欲對頂面喉叫，
對伊徛起的聖所出聲，
對伊的羊群大聲喉叫；
伊欲對地上攏總的百姓喝喊，
親像踏葡萄者一樣。
31 欲有喝的聲聽到地極，
因為耶和華欲及列國計較；
見有血氣者，伊欲及𪜶爭辯；
論到歹人，伊欲將𪜶交互刀劍。
這是耶和華講的。
32 萬軍的耶和華按呢講：
看啊，欲有災禍對此國發到彼國，
閣有大颶頭風對地極起。
33 「當彼日，耶和華所刣者對地的此旁到地的彼旁攏有。無人啼哭，無人給伊收拾，無人給伊埋葬，欲成做地上的糞埽。
34 牧者啊，恁著哀哭，喉叫；
羊群的頭目啊，恁著翱佇火灰中；
因為恁受刣及分散的日期已經到。
恁欲倒落去，親像人所歡喜的器具磕落。
35 牧者無路通逃走；
羊群的頭目亦無路通脫離。
36 有牧者喉叫的聲，
有羊群的頭目啲哀哭，
因為耶和華互𪜶的草場拋荒。
37 耶和華發出猛烈的受氣，
平安的羊成做冷靜。
38 伊親像獅離開伊的穴，
因為欺壓的猛烈閣因為伊受氣的猛烈，
𪜶的地攏成做通卬愕的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。