上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
15
摩西的歌
彼時，摩西及以色列人唱此個歌謳咾耶和華，講：
我欲唱歌謳咾耶和華，因為伊至高至大，
將馬及騎馬者㧒佇海中。
2 耶和華是我的氣力，是我的詩歌，
也是做我拯救的主。
伊是我的上帝，我欲謳咾伊，
是我的父的上帝，我欲尊伊做大。
3 耶和華是戰士；
伊的名是耶和華。
4 法老的車、及伊的軍兵，耶和華㧒伊佇海中；
伊特別揀的軍長攏沈佇紅海。
5 深淵蓋𪜶；
𪜶親像石頭墜到深的所在。
6 耶和華啊，你的正手展出能力，得著榮光；
耶和華啊，你的正手拍碎對敵。
7 你發出大威嚴，捙倒許個起來攻擊你者；
你發出大受氣，燒毀𪜶親像燒草。
8 你發出鼻中的氣，水就愈淐愈高，
大水徛起來親像歸堆，
海中的深水堅定。
9 對敵講：我欲追𪜶，我欲趇著𪜶；
我欲分所搶的物，我欲佇𪜶來足我的心願。
我欲拔刀，我的手欲滅𪜶。
10 你一下歕風，海就蓋密𪜶；
𪜶親像鉛沈佇大水中。
11 耶和華啊，諸個上帝的中間，是誰會親像你？
是誰親像你──至聖通榮光，
威嚴通謳咾，行出奇事？
12 你伸出正手，
地就吞滅𪜶。
13 你用你的慈愛，導你所救贖的百姓；
你用你的權能，導𪜶入你聖的所在。
14 列邦聽見就愕愕惙，
徛起佇非利士地的抵著痛苦。
15 彼時，以東的族長卬愕，
摩押英雄的人致到愕愕惙，
迦南地徛起的百姓心攏消溶。
16 卬愕驚惶到佇𪜶。
耶和華啊，因為你的手的大權能，
𪜶定定親像石頭，
聽候你的百姓經過，
聽候你所得著的百姓過去。
17 你欲導𪜶入去，栽培𪜶佇你的產業的山──
耶和華啊，就是你為家己所備辦徛起的所在，
主啊，就是你的手所建立的聖所。
18 耶和華欲做王，直到永遠！
米利暗的歌
19 因為法老的馬、及伊的車，伊的馬兵到佇海中，耶和華互海水返流，淹密𪜶；獨獨以色列人佇海中行乾地。
20 亞倫的大姊，女先知米利暗，手裡攑鈴瓏鼓；眾婦女也隨伊出去，攑鈴瓏鼓跳舞。
21 米利暗和所唱的講：
恁著唱歌謳咾耶和華，因為伊至高至大，
將馬及騎馬者㧒佇海中。
苦水
22 摩西導以色列人對紅海進前行，𪜶出去到書珥的曠野，佇曠野行三日，尋無水。
23 到瑪拉的時，瑪拉的水𣍐飲得；因為水苦，所以名彼個地叫瑪拉。
24 百姓就對摩西哀怨，講：「阮欲飲甚麼啊？」
25 摩西求叫耶和華，耶和華指示伊一欉樹。伊就㧒伊佇水裡，水就變甘。
伊佇遐為𪜶定律例、法度，佇遐試驗𪜶；
26 閣講：「你若致意聽耶和華──你的上帝的聲，閣行伊所看做合宜的事，留心聽伊的誡命，守伊一切的律例，就我互埃及人所抵著的破病，的確無互你抵著，因為我──耶和華是醫治你者。」
27 𪜶到以琳，佇遐有十二個水泉，七十欉的棗樹；𪜶就佇遐的水邊紮營。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。