上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
14
過紅海
耶和華給摩西講：
2 「你吩咐以色列人越倒轉，紮營佇比‧哈希錄的頭前，佇密奪及海的中間，佇巴力‧洗分的頭前，佇彼對面紮營佇海邊。
3 法老欲議論以色列人講：『𪜶佇地中踅無路，曠野給𪜶圍困啲。』
4 我欲互法老的心硬，伊欲追趇𪜶，我就佇法老及伊的全軍來得著榮光；埃及人就知我是耶和華。」𪜶就按呢行。
5 有人報埃及王講：「彼個百姓走去。」法老及伊的人臣對待彼個百姓的心就變換，講：「咱准以色列人去，無閣服事咱，這是甚麼緣故啊？」
6 法老就備辦伊的車，帶伊的百姓相及去，
7 也帶六百張特別車及埃及所有的車，逐張車攏有兵頭啲管。
8 耶和華互埃及王法老的心硬，伊就追趇以色列人，若是以色列人靠大權能的手出去。
9 埃及人追趇𪜶，法老一切的馬、車、及伊的馬兵，及伊的軍隊，就佇海邊，倚近比‧哈希錄，佇巴力‧洗分的對面，佇𪜶安營的所在趇著𪜶。
10 法老近倚的時，以色列人攑目看見埃及人趇倚來，就真驚，喉叫耶和華。
11 𪜶對摩西講：「豈是埃及無塚地，你才導阮出來死佇曠野嗎？你啥事按呢款待阮，導阮出埃及啊？
12 阮佇埃及豈無對你按呢講，莫得插阮，出在阮服事埃及人嗎？因為服事埃及人卡值死佇曠野。」
13 摩西對百姓講：「免驚，做恁徛啲！看耶和華今仔日為著恁所欲行的拯救。因為恁今仔日所看見的埃及人，的確永遠無閣看見。
14 耶和華欲為恁交戰；做恁恬恬，莫做聲。」
15 耶和華對摩西講：「你啥事喉叫我啊？你著教以色列人進前去。
16 你攑柺仔伸手指海，來分開伊。以色列人欲佇海中行乾地。
17 獨獨我，我欲互埃及人的心硬，𪜶欲隨落去。我欲佇法老及伊的全軍、伊的車、伊的馬兵來得著榮光。
18 我佇法老及伊的車、伊的馬兵得著榮光的時，埃及人就知我是耶和華。」
19 上帝的使者本行佇以色列的營前者，徙來行佇𪜶的後面；雲柱也對𪜶的頭前徙來徛佇𪜶的後面。
20 佇埃及營及以色列營的中間，彼旁有雲有黑暗，此旁暝時發出光，通暝二旁𣍐相近。
21 摩西就伸手指海，耶和華通暝互東風大起，互海退去，水就分開，海就成做乾地。
22 以色列人落海中行乾地，水佇𪜶的雙旁成做牆壁。
23 埃及人追趇𪜶，法老一切的馬、車，及馬兵，攏隨𪜶到海中。
24 到天欲光的時，耶和華對雲及火的柱中俯落看埃及的軍隊，拍亂𪜶的隊伍；
25 閣互𪜶的車輪落落，得行，致到埃及人講：「咱著對以色列人的面前逃走！因為耶和華為著𪜶及埃及人交戰。」
26 耶和華給摩西講：「你伸手指海，互水倒轉來淹埃及人及𪜶的車、𪜶的馬兵。」
27 摩西就伸手指海，到天一下光，海水閣照舊。埃及人逃走，水截佇𪜶的頭前，耶和華就將埃及人捙倒佇海中，
28 水就返流，淹密許個車及馬兵。法老的全軍隨以色列人落海者，連一個也無留啲。
29 總是以色列人佇海中行乾地；水佇𪜶的雙旁成做𪜶的牆壁。
30 彼日，耶和華按呢救以色列人脫離埃及人的手，以色列人看見埃及人的身屍佇海邊。
31 以色列人看見耶和華對埃及人所行的大事，就敬畏耶和華，閣信服耶和華及伊的奴僕摩西。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。