上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
66
上帝審判萬民
耶和華按呢講：
天是我的座位；
地是我的腳踏椅。
恁欲給我起甚麼號的厝？
甚麼號的所在是做我安息的地方啊？
2 耶和華講：諸個攏是我的手所創造的，
所以諸個就攏有。
總是我所看顧的，
就是謙虛心痛悔、
因為我的話來愕愕惙的人。
3 刣牛，無各樣刣人，
獻羊，無各樣摃折狗頷頸，
獻禮物，無各樣獻豬血，
燒乳香，無各樣謳咾偶像。
𪜶揀家己的道路，
心歡喜𪜶可惡的事。
4 我亦揀迷惑𪜶的事，
互𪜶所驚惶的臨到𪜶；
因為我叫，無人應；
我講話，𪜶無聽趁；
反轉行我目睭中看做歹的，
揀我所無歡喜的。
5 恁因為耶和華的話來愕愕惙的人著聽伊的話；
恁的兄弟怨恨恁，
因為我的名革逐恁者，曾講：
願耶和華得著榮光，
互阮得著看見恁的歡喜；
總是𪜶欲抵著見誚。
6 有喧嘩的聲對城內出！
有聲對殿內出！
就是耶和華報應伊的對敵的聲！
7 錫安猶未抵著生子的艱苦就生產，
猶未知痛疼，就生查甫子。
8 親像此號事是誰曾聽見？
諸個事是誰曾看見啊？
國豈會一日來生？
百姓豈會霎仔久來出世？
因為錫安一下抵著生子的艱苦就生子兒。
9 耶和華講：我已經互伊臨盆，
豈無互伊生出嗎？
你的上帝講：我互人生子者，
豈關密伊的胎嗎？
10 恁諸個疼耶路撒冷者，
著及伊同快樂為伊歡喜；
恁為著伊悲哀者，
今著及伊歡喜快樂。
11 致到恁通吸伊的安慰的奶頭來得著飽，
互恁得著伊豐盛的榮光，
親像尋著恁滿心歡喜。
12 耶和華按呢講：
看啊，我欲互平安開闊到佇伊，親像江河，
互列國的榮光到佇伊，親像漲滿的河。
恁欲享受伊；
恁欲得著抱佇身邊，搖佇腳頭窩頂。
13 親像人得著伊的老母安慰伊，我亦欲按呢安慰恁；
恁亦欲佇耶路撒冷得著安慰。
14 恁看見，心就快樂；
恁的骨欲得著潤澤親像軟軟的草一樣；
閣耶和華的手欲顯現佇伊的奴僕；
伊亦欲受氣伊的對敵。
15 看啊，耶和華欲佇火中降臨；
伊的車親像捲螺風，
用大受氣行報應，
用火焰行責罰；
16 因為耶和華欲用火用刀，
及一切有血氣的人爭戰；
互耶和華所刣死的多多。
17 「許個分別做聖、清氣家己者，進入佇園內跟隨彼中間一個人的後面，食豬肉及可惡的物及老鼠，𪜶欲做一下滅無；這是耶和華講的。
18 「因為我知𪜶的行做及𪜶的念頭。時到，我欲聚集萬百姓萬族𪜶欲來，欲看我的榮光，
19 我欲設記號佇𪜶中間。逃走者，我欲差𪜶到列國，就是到他施、普勒，開弓的路德及土巴、雅完，及平素未有聽見我的名聲、未有看見我的榮光遠遠的海嶼；𪜶欲將我的榮光傳報佇列國中。
20 𪜶欲送恁的眾兄弟對列國中倒來，互𪜶有的騎馬，有的坐車，坐轎，騎騾，騎駱駝，到我的聖山耶路撒冷，做禮物獻互耶和華，親像以色列人用清氣的器具貯禮物，獻佇耶和華的厝；這是耶和華講的。
21 耶和華講：我欲對𪜶中間取人做祭司，做利未人。」
22 耶和華講：因為我所造的新天新地，
佇我的面前長長佇啲；
親像按呢，恁的後裔及恁的名字亦欲長長佇啲。
23 逐擺抵著月的初一，逐擺抵著安息日，
見若有血氣者，欲到我的面前跪拜。
這是耶和華講的。
24 𪜶欲出去看許個悖逆我的人的身屍；
因為𪜶的蟲𣍐死；
𪜶的火𣍐熄；
見有血氣者攏欲厭惡𪜶。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。