上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
48
上帝掌管未來
雅各的家，用以色列的名來稱呼者，
對猶大的水源出來的，
恁著聽啊！
恁指耶和華的名來咒誓，
稱呼以色列的上帝，
總是無用誠實，無用公義。
2 因為𪜶家己稱做聖城的百姓，
倚靠以色列的上帝──名做萬軍的耶和華。
3 以前的事，我對古早講明，
已經出我的嘴，
亦是我所指示的；
我忽然間做，代誌就成。
4 因為我平素知你是硬心者──
你的頷頸是鐵的；
你的頭額是銅的。
5 所以，我對古早給你講明，
佇猶未成的代先指示你，
免得你講：諸個事是我的偶像所行的，
是我雕刻的偶像，及我鑄造的偶像，所命令的。
6 你已經聽見，今著攏總看伊；
恁豈著報揚嗎？
對今以後，我將新的事，
就是你所未知隱密的事指示你。
7 諸個事是現今創造的，是對早就有；
佇今仔日以前，你亦未曾聽見，
免得你講：諸個事我已經知啦。
8 你實在未曾聽見，你實在知；
你的耳孔對起頭實在無開。
我本知你行代誌極其詭詐，
你對出胎以來，
就稱做悖逆者。
9 我為著我的名延迁我的受氣，
為著我的名聲寬容你，
無給你剪除。
10 看啊，我鍛煉你，亦是親像銀；
你佇苦難的火爐中，我揀你。
11 我為著家己的緣故，為著家己的緣故欲成此個代誌，
我豈通互我的名受凌辱？
我無欲將我的榮光歸互別個。
耶和華揀選古列做領導者
12 雅各──我所召的以色列啊，
著聽我：
我是耶和華，
我是起頭者，亦是路尾者。
13 我的手建立地的地基；
我的正手展開諸個天；
我一下叫就攏起來徛。
14 恁攏著聚集來聽，
𪜶中間是誰曾講諸個事？
耶和華所疼者欲佇巴比倫行伊所歡喜的；
伊的手欲到佇迦勒底人。
15 獨獨我，我已經講，我亦揀召伊，
導伊來，伊的路欲亨通。
16 恁著就近我來聽這：
我對起頭未曾佇隱密的所在來講；
對有此個事，我就佇遐。
今主耶和華差我及伊的神來。
耶和華對伊的百姓的計劃
17 救贖你的主──耶和華，
以色列的聖者按呢講：
我是耶和華──你的上帝，
我教示你，互你得著利益，
導你佇應該行的路。
18 嗐啊，你未曾聽我的命令！
若聽，就你的平安親像河水；
你的公義親像海湧。
19 你的後裔多親像沙；
你的腹肚內所生者亦多親像沙粒。
伊的名佇我的面前的確無剪除，
亦無滅絕。
20 恁著對巴比倫出來，
對迦勒底人的中間走出，
用歡喜大聲傳報互人聽講：
耶和華救贖伊的奴僕雅各！
恁著將此個報揚到地極。
21 伊引導𪜶經過沙漠。
𪜶亦無嘴乾；
伊為著𪜶互水對石磐流出，
石磐裂開，水就淐出。
22 耶和華講：
歹人的確𣍐平安！
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。