上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
40
希望的話
恁的上帝講：
恁著安慰，安慰我的百姓。
2 著對耶路撒冷講好話，
閣報伊知，
伊的交戰已經盡；
伊的罪過已經赦；
伊為著伊一切的罪，
對耶和華的手加倍受刑罰。
3 有聲叫講：
佇曠野備辦耶和華的路，
佇沙漠的地，修平咱的上帝的大路。
4 諸個山谷攏欲填互伊淀，
大細的山頭攏欲掘互伊低；
彎越的欲改互伊直，
嵁硈的欲修互伊平。
5 耶和華的榮光的確顯現；
凡若有血氣者欲攏看見；
因為這是耶和華親嘴講的。
6 有聲講：你著叫！
伊講：我著叫甚麼？
見若有血氣者攏親像草；
伊的榮光攏親像山裡的花。
7 草會乾，花會謝，
因為耶和華的氣吹佇伊的頂面；
百姓真正是草。
8 草會乾，花會謝，
獨獨咱的上帝的話的確永遠佇啲。
9 報好消息互錫安的啊，
你著上高山；
報好消息互耶路撒冷者啊，
你著盡力出你的聲。
著出聲免驚，
對猶大的城講：
看啊，恁的上帝！
10 看啊，主耶和華欲親像大權能者臨到；
伊的手的確為伊掌權。
看啊，伊的賞賜佇伊遐；
伊的報答亦佇伊的面前。
11 伊欲親像牧者顧伊的羊群，
伊欲用手伏倚羊仔子抱伊佇胸前，
慢慢導許個互羊仔吸奶者。
以色列的上帝無通比並
12 是誰曾用手心量諸個水，
用手虎口量穹蒼，
用斗貯大地的土粉，
用秤秤山嶺，
用天秤秤山頭啊？
13 是誰曾測𢜬耶和華的心，
抑是做伊的謀士來指教伊啊？
14 伊及是誰商量，是誰教示伊，
將公平的路指示伊，
閣將智識教示伊，
將通達的道路指教伊啊？
15 看啊，萬百姓攏親像水桶的一滴水，
閣親像天秤頂的塵埃；
伊提諸個海嶼起來，親像極微細的物。
16 黎巴嫩無夠額通做火柴；
其中的走獸無夠額做燒祭。
17 萬百姓佇伊的面前親像無物，
互伊看極其無，就是空空。
18 恁究竟欲將是誰比並上帝，
用甚麼形像及上帝比並啊？
19 偶像是師傅鑄造，
銀匠用金安伊，
給伊鑄銀鍊。
20 喪鄉人無力通獻此號物，
就揀𣍐會朽壞的柴，
為伊尋奇巧的師傅，
祀𣍐會搖動的偶像。
21 恁豈未知嗎？
恁豈未聽見嗎？
對起頭豈無給恁講嗎？
對設立地的根基恁豈無明白嗎？
22 主坐佇地的大環；
地上徛起的百姓親像草蜢。
伊展開天親像帳幅，
安置伊親像通徛起的布棚。
23 伊互君王歸佇無，
互地上的審判官成做空虛。
24 𪜶是抵仔栽，
抵仔種，
伊的欉抵仔釘根佇地裡，
伊一下吹佇伊頂面，就攏枯焦；
捲螺風將伊吹去，親像草幼一樣。
25 至聖者講：恁欲用是誰比並我，
互我及伊平啊？
26 恁攑目看頂面，
看是誰創造諸個，
照數目導許個萬軍出來，
伊一個一個稱𪜶的名；
因為伊的權能，
閣因為伊的大權能大氣力，
連一個亦無欠。
27 雅各啊，你啥事講，
以色列啊，你啥事講，
我的道路隱密佇耶和華？
我的案件無得著上帝料理？
28 你豈未知嗎？
你豈未聽見嗎？
永永佇啲的上帝耶和華，創造地極者，
伊無厭，亦無倦；
伊的智慧無通測𢜬。
29 厭倦者，伊互伊能力；
軟茈者，伊加添伊的氣力。
30 少年人亦會厭會倦；
勇壯的人亦會跋倒。
31 獨獨倚靠耶和華者欲得著新的氣力。
𪜶欲親像鷹鳥展翅飛高；
𪜶走亦無厭，
行亦無倦。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。