上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
19
上帝欲刑罰埃及
論埃及的默示：
看啊，耶和華坐緊緊的雲，
臨到埃及。
埃及的偶像佇伊的面前愕愕惙；
埃及人的心佇內面消溶。
2 我欲激動埃及人攻擊埃及人──
兄弟攻擊兄弟，
厝邊攻擊厝邊；
城攻擊城，
國攻擊國。
3 埃及人的心神欲佇內面失膽；
我欲敗壞𪜶的計謀。
𪜶欲求偶像及唸咒的、
做童乩的、行邪術的。
4 我欲將埃及人交佇殘忍的主的手；
強暴的王欲管轄𪜶。
這是主──萬軍的耶和華講的。
5 海中的水欲絕斷，
河水欲消無乾去。
6 江河欲變臭味；
埃及的河水欲減少焦啦去。
蘆葦及蘆竹攏枯焦。
7 河邊及河口的草埔，
以及河邊所栽種的，攏枯焦，
受掃除，無去。
8 討魚者欲啼哭。
放釣佇河裡的欲悲傷；
拋網佇水裡的欲衰敗。
9 織幼苧的及織白布的
攏欲見誚；
10 國家的柱石欲抵著拍碎，
所有的倩工人，心欲煩惱。
11 瑣安的首領極其愚戇；
法老大智慧的謀士，
所計劃的成做愚蠢。
恁豈可敢對法老講：
我是智慧人的子孫，
我是先王的子孫？
12 你的智慧的人佇叨落？
萬軍的耶和華論埃及所定著的旨意，
𪜶通來知，通給你講啦！
13 瑣安的首領攏變做戇；
羅弗的首領攏受迷惑。
埃及支派厝角頭的石，
導伊的百姓佇迷路。
14 耶和華用乖謬的神參入佇𪜶中間；
致到𪜶導埃及一切所行的攏差錯，
親像食酒醉的人嘔吐的時東倒西歪一樣。
15 埃及的中間，無論頭及尾，
棕枝及蘆葦，所做的工無一項會成。
16 到彼日，埃及欲親像婦仁人一樣，閣欲驚惶愕愕惙，因為萬軍的耶和華的手的舞弄，就是伊佇𪜶的頂面所舞弄的。
17 猶大地欲做埃及所驚惶的，見若對伊講起猶大地，伊就驚惶。這是萬軍的耶和華對佇埃及所定著的旨意。
18 當彼日，埃及地欲有五個城講迦南的腔口，閣指萬軍的耶和華來咒誓。欲有一個稱做「滅無的城」。
19 當彼日，佇埃及地的中間欲為著耶和華起一座壇；佇埃及的邊界欲為耶和華竪一支柱。
20 這攏欲佇埃及地為萬軍的耶和華做記號及證據。埃及人因為受人的制壓哀求耶和華，伊就差一位拯救者就是有才能者，來拯救𪜶。
21 耶和華欲互埃及人識伊。佇彼日，埃及人的確識耶和華，亦欲獻祭物及禮物敬拜伊，閣對耶和華下願謝願。
22 耶和華欲拍埃及，亦拍亦醫治伊，𪜶欲歸向耶和華。伊欲聽𪜶的祈禱，來醫治𪜶。
23 當彼日，欲有大路對埃及透到亞述。亞述人欲入埃及，埃及人亦欲入亞述；埃及人欲及亞述人相及服事耶和華。
24 當彼日，以色列欲及埃及參亞述三個平列，互地上的人得著福氣；
25 因為萬軍的耶和華賜福𪜶，講：「埃及──我的百姓，亞述──我的手所造的，以色列──我的產業，攏有福氣！」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。