上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
14
對逃走中倒去本所在
耶和華欲憐憫雅各，欲閣揀以色列，將𪜶安置佇本所在。寄腳的欲歸倚𪜶，及雅各家聯合。
2 列邦欲將𪜶帶倒來本所在；以色列家欲佇耶和華的地得著𪜶做奴僕女婢，亦欲搶掠前搶掠𪜶者，管轄前壓制𪜶者。
巴比倫王佇陰間
3 當耶和華互你脫離艱苦、煩惱，及人勉強你做的苦工，得著平安的日，
4 你欲做此個歌論巴比倫王講：
制壓人的怎樣竟然無去？
勒索人的怎樣竟然無去？
5 耶和華有遏折歹人的柺，
及管轄人者的權柄，
6 就是佇受氣中連連拍諸個百姓的，
佇受氣中管轄列國，
行窘迫無人阻止的。
7 今全地得著安息、平靜；
人攏出歡喜的聲。
8 松樹及黎巴嫩的柏香樹
攏因為你歡喜，講：
對你倒落去，
無人閣上來剉阮。
9 你落去的時，
陰間就為你振動來迎接你，
閣因為你驚動許個曾佇世間做領袖的陰魂，
亦互許個曾做列國的君王的，
攏對伊的座位徛起來。
10 𪜶攏欲應你講：
你亦變做軟弱親像阮嗎？
你亦及阮相親像嗎？
11 你的威風及你的琴瑟的聲攏落到陰間。
舖佇你的下面的是蟲，蓋佇你的頂面的是蛆。
12 天光早的啟明星啊，
你怎樣對天墜落？
你此個攻破列國的怎樣受砍倒佇地上？
13 你的心內曾講：
我欲上到天頂；
我欲舉起我的座位佇上帝眾星的頂面；
我欲坐佇聚會的山，佇北方的極頭。
14 我欲上到比雲卡高的頂面；
我欲及至高者平等。
15 總是，你欲墜落陰間，
到深坑的極頭。
16 凡若看見你的攏欲注目看你，
留心想你，講：
17 互大地搖泏，
互列國振動，
互世界拋荒，
互城牆捙倒，
無解放受掠的人倒去𪜶兜，
是此個人嗎？
18 列國的君王
攏逐個有榮光睏佇伊的墓。
19 獨獨你受㧒擲，
𣍐得著入你的墓，
親像通厭賤的枝，
用受刣的人做衫，
就是受刀鑿死，
墜落坑中石頭彼位者；
你閣親像受𧿬踏的身屍。
20 你𣍐得著及𪜶同埋葬；
因為你敗壞你的國，刣死你的百姓。
歹人的後裔的確永遠無名。
21 因為祖公的罪，
著備辦刣死𪜶的子孫，
免得𪜶興起，來佔地，
起城遍世間。
上帝欲毀滅巴比倫
22 萬軍的耶和華講：
我欲起來攻擊𪜶，
欲對巴比倫除滅伊的名及所剩的，
以及伊的子伊的孫。
這是耶和華講的。
23 我欲互伊的地做河豬所𫢶的位，
閣變做水池；
我欲用滅無的掃帚掃除伊。
這是萬軍的耶和華講的。
上帝欲毀滅亞述
24 萬軍的耶和華有咒誓講：
我所想的，決斷欲成；
我所定著的，決斷建立，
25 我欲拍敗亞述人佇我的地，
𧿬踏伊佇我的山。
伊的軛欲離開我的百姓；
伊的重擔欲離開我的百姓的肩頭。
26 這是已經定著欲行佇全地的旨意；
這是伸佇萬國頂面的手，
27 萬軍的耶和華已經定著旨意，是誰會廢無伊？
伊的手已經伸出，是誰會互伊勼倒轉？
上帝欲毀滅非利士
28 亞哈斯王死彼年，有此個默示：
29 非利士的全地啊，
莫得因為拍你的枴已經折來歡喜。
因為對蛇的卵欲生出毒蛇；
伊所生的是飛的火蛇。
30 喪鄉人的大子欲得著食；
欠缺的人欲安然倒啲。
我欲用飢荒餓死你的種類；
伊欲刣死你所剩的。
31 門啊，著啼哭！
城啊，著喉叫！
非利士全地啊，你消無啦！
因為有煙對北勢來，
伊的兵丁無一個漏陣。
32 欲怎樣應列國的使者啊？
著講：耶和華建立錫安；
伊的百姓中困苦的人欲投歇佇彼內面。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。