上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
10 有災禍啊！許個設立不義的律例者
及記載奸詐的判詞者，
2 枉屈喪鄉人的案件，
搶奪我的百姓中困苦的人的情理，
用寡婦準做所搶的物，
用孤兒準做所劫的物。
3 當降刑罰的日，有災禍對遠遠臨到，
彼時，恁欲怎樣？
恁欲走去求甚麼人救恁啊？
恁的財寶欲留佇甚麼所在？
4 𪜶只有屈身佇受掠的人的下面，
倒佇受刣的人的下面。
雖然按呢，耶和華的受氣猶未消；
伊的手猶原伸啲。
上帝用亞述王做工具
5 有災禍啊，亞述是我受氣的槌，
手中攑我的痛恨做柺。
6 我欲差伊攻擊邪惡的邦國，
吩咐伊攻擊我所受氣的百姓，
搶伊所搶的，掠伊所掠的，
將𪜶𧿬踏，親像街路的土糜一樣。
7 總是，伊是此號意思；
伊的心亦是此個打算。
伊的心內反轉想毀滅，
剿滅多多國。
8 因為伊講：我的人臣豈無攏是王嗎？
9 迦勒羅豈是親像迦基米施嗎？
哈馬豈是親像亞珥拔嗎？
撒瑪利亞豈是親像大馬色嗎？
10 我的手已經到偶像的國；
𪜶雕刻的偶像
贏過耶路撒冷及撒瑪利亞的偶像。
11 我怎樣款待撒瑪利亞及其中的偶像，
豈𣍐照按呢款待耶路撒冷及其中的偶像嗎？
12 主佇錫安山及耶路撒冷成伊一切所做者的時，講：「我欲刑罰亞述王心驕的行做及伊目頭高的榮光。」
13 因為伊講：
我所成的事是用我的手的能力
及我的智慧，
我本有聰明。
我移徙列國的地界，
搶𪜶的財寶；
閣我親像勇士，互坐高位的降做低。
14 我的手提著列國的財寶，
親像提鳥仔巢；
我得著全地，
親像拾著所放拺的鳥仔卵。
無有撇翅的；
無有開嘴的，無有哮叫的。
15 今斧頭豈會對用伊來剉柴者家己誇口嗎？
鋸仔豈會對彼個拖鋸者家己品嗙嗎？
這是親像槌仔運轉彼個攑伊者，
親像柺仔攑起彼個是柴者。
16 因為按呢，主──萬軍的主，
欲互伊肥的變做瘦，
佇伊榮光的下面欲有火𤏸起來，
親像火燒一樣。
17 以色列的光欲做火；
伊的聖者欲做火焰。
佇一日的中間，將伊的莿帕
及蒺藜燒了了；
18 閣將伊的樹林及肥地的榮光，對神魂到肉體攏燒滅伊，
勢面親像破病人漸漸衰敗。
19 伊的樹林剩的樹無幾欉，
囝仔亦會記伊的數額。
剩的百姓倒轉來
20 到彼日，以色列所剩的及雅各家所逃脫的，無閣倚靠彼個拍𪜶的，是欲誠實倚靠耶和華──以色列的聖者。
21 所剩的，欲倒轉來，就是雅各家所剩的，歸佇全能的上帝。
22 以色列啊，你的百姓雖然多親像海沙，只有剩的倒轉來。衰敗的事已經定著，用公義來充滿。
23 因為主──萬軍的耶和華佇全地中欲行所定著的滅無。
耶和華欲刑罰亞述
24 所以，主──萬軍的耶和華按呢講：「徛起錫安我的百姓啊，亞述雖然用槌拍恁，閣親像埃及的款攑枴仔攻擊你，你免驚伊。
25 因為閣霎仔久，受氣就欲明白，閣我的受氣欲對𪜶的滅無來息。
26 萬軍的耶和華欲攑起鞭來拍伊，親像佇俄立的石磐拍米甸。伊的柺仔欲伸佇海頂，伊欲攑起，親像佇埃及一樣。
27 到彼日，亞述的重擔欲離開你的肩頭；伊的軛欲離開你的頷頸；伊的軛也欲因為抹油的緣故來毀壞。」
侵入者進攻
28 亞述到亞葉，
經過米磯崙，
放行李佇密抹。
29 𪜶經過隘口，
佇迦巴歇暝。
拉瑪人驚惶；
掃羅的基比亞人逃走。
30 迦琳徛起的百姓啊，著大聲喉叫！
萊煞的人啊，著俯耳孔！
慘啊！困苦的亞拿突啊！
31 瑪得米那人閃避；
基柄徛起的百姓逃走。
32 彼日，伊紮兵佇羅伯，
比手向錫安城的山──
就是耶路撒冷的山頭。
33 看啊，主──萬軍的耶和華
用互人驚的威嚴來剉樹枝；
長的欲受剉，
高的欲降低。
34 艷的樹林，伊欲用鐵器剉伊；
閣黎巴嫩欲對大權能者來倒落去。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。