上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
8
用以賽亞的子做記號
耶和華對我講：「你提一個大的牌，用人通行的字來寫，論起『瑪黑珥‧沙拉勒‧哈施‧罷斯』。
2 我欲叫誠實的干證，就是祭司烏利亞及耶比利家的子撒迦利亞來做干證。」
3 我及先知娘同房；伊懷孕生子，耶和華就對我講：「給伊號名叫瑪黑珥‧沙拉勒‧哈施‧罷斯；
4 因為此個嬰仔𣍐曉叫阿爸、阿母的代先，大馬色的財寶及撒瑪利亞受搶的物攏搬佇亞述王的面前。」
亞述王欲來
5 耶和華閣對我講：
6 「因為此個百姓厭賤西羅亞慢慢流的水，歡喜利汛及利瑪利的子；
7 所以，主欲互彼個河真大真雄的水流來淹𪜶，就是亞述王及伊一切的榮光，欲𨃟過伊一切的水溝，漲滿伊諸個岸；
8 欲沖入猶大，漲滿四界淹，高到頷頸。以馬內利啊，伊的翅展開，遍滿你的地。」
9 列國的百姓啊，出在恁喧嘩，到尾的確破壞；
遠的人啊，著俯耳孔來聽！
出在恁縖腰，的確欲破壞；
出在恁縖腰，的確欲破壞。
10 出在恁設計謀，的確歸空空；
出在恁議論，的確𣍐成立；
因為上帝及阮佇啲。
耶和華警告先知
11 耶和華用大權能的手，指示我用話警戒我講，通行此個百姓所行的路，對我講：
12 「此個百姓所講叫做結黨的，恁莫得講做結黨。𪜶所驚的，恁莫得驚，亦莫得愞。
13 獨獨著尊萬軍的耶和華做聖，伊是恁所著驚者，所著愞者。
14 伊欲做聖所，亦欲向以色列二家做跋倒人的石，塞礙人的石磐；向耶路撒冷徛起的百姓做活罩及羅網。
15 多多人欲佇彼頂面著觸跋倒，跋到碎碎，亦互伊網著掠著。」
通去問死人
16 你著將干證的話捲緊緊，封密律法佇我學生的中間。
17 我欲聽候耶和華就是家己掩伊的面佇雅各的家者；我亦欲向望伊。
18 看啊，我及耶和華所互我的子，攏是萬軍的耶和華𫢶佇錫安山的，所用做兆頭記號佇以色列中者。
19 若有人對恁講：「恁著去問童乩及行邪術者，𪜶的聲音嘰嘰叫叫，言語細細。」著應講：「百姓豈著問伊的上帝嗎？豈通為活人去問許個死者嗎？」
20 人著照律法及干證的話；若無趁此個話來講，就𣍐得著看見早起時的光。
受艱苦的時
21 𪜶欲經過此個地，受艱苦，受枵餓；枵餓的時，心內家己受氣，咒詛𪜶的王及𪜶的上帝。
22 攑頭看天，俯落看地，無拍算，一盡是艱苦、黑暗，及痛苦的黑暗。受趕佇黑黑暗暗的內面。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。