上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
4
上帝賜摩西行神蹟的權能
摩西應講：「看啊，𪜶欲信我，也聽我的話，因為𪜶欲講：『耶和華未曾對你出現。』」
2 耶和華對伊講：「佇你手裡是甚麼？」伊講：「是枴仔。」
3 講：「㧒佇地裡。」伊一下㧒佇地裡，就變做蛇；摩西就走閃伊。
4 耶和華對摩西講：「伸你的手掠伊的尾，就伸手掠伊，佇手中猶原變做枴仔；
5 按呢通互𪜶信耶和華──𪜶的祖公的上帝，亞伯拉罕的上帝，以撒的上帝，雅各的上帝，有對你出現。」
6 耶和華閣對伊講：「下你的手佇你的胸前。」就下手佇胸前，抽出來的時，看啊，手已經癩𰣻，白親像雪。
7 閣講：「閣下你的手佇你的胸前。」伊就下佇伊的胸前，抽出來的時，看啊，已經照原，及通身軀的肉無各樣；
8 閣講：「設使𪜶無欲信你，也無欲聽頭一個神蹟，就欲信第二個神蹟。
9 彼二個神蹟𪜶若攏信，也聽你的話，你著對河裡舀水，倒佇乾地，你對河裡所舀的水欲佇乾地變做血。」
10 摩西對耶和華講：「主啊，我平素是會講話的人，對你給你的奴僕講話的了後，也是按呢。我是嘴舌鈍的人。」
11 耶和華對伊講：「創造人的嘴是是誰啊？互人啞口、臭耳聾、目睭金、睛瞑的是是誰啊？豈是我──耶和華嗎？
12 今你去啊，我欲賞賜你口才，教示你所應該講的。」
13 伊講：「主啊，你合意差是誰，就差伊去！」
14 耶和華對摩西發出受氣講：「豈是有你的兄利未人亞倫嗎？我知伊是會講話的人；閣伊今出來迎接你，伊一下看見你，心內就歡喜。
15 你著對伊講，用所應該講的話傳互伊；我也欲賞賜你及伊有口才，閣欲教示恁所應該行的事。
16 伊欲替你對百姓講話；伊欲對你准做嘴，你欲對伊准做上帝。
17 你的手著攑此支枴仔，用伊來行神蹟。」
摩西倒去埃及
18 對按呢摩西就去，倒去伊的丈人葉忒羅遐，給伊講：「求你容允我倒去看我的兄弟佇埃及的，看𪜶猶佇啲抑無。」葉忒羅給摩西講：「你通安然去啦！」
19 耶和華佇米甸對摩西講：「你去，倒去埃及，因為愛害你的生命的人攏死啦。」
20 摩西帶伊的某及二個子，互𪜶騎驢，倒去埃及地。摩西手裡攑上帝的柺仔。
21 耶和華對摩西講：「你倒去埃及的時，著注意將我所交佇你的手一切的奇事行佇法老的面前。總是我欲互伊的心硬，伊也無欲放此個百姓去。
22 你著給法老講：『耶和華按呢講：以色列是我的子，就是我的大子。
23 我曾對你講：著解放我的子去，通服事我。你也准伊去。看啊，我欲刣死你的子，就是你的大子。』」
24 摩西佇路裡佇客店，耶和華抵著伊，欲互伊死。
25 西坡拉就提一塊利石，割伊的子陽物的皮，㧒佇伊的腳前，講：「你是我血的丈夫。」
26 耶和華就放伊息。婦仁人講：「你是血的丈夫，因為割禮的緣故。」
27 耶和華給亞倫說：「你去曠野迎接摩西。」伊就去，佇上帝的山抵著伊，就給伊唚。
28 摩西將耶和華差伊講的話及吩咐伊行的神蹟攏給亞倫講。
29 摩西、亞倫就去招集以色列人眾長老。
30 亞倫將耶和華對摩西所講的話攏講伊，閣佇百姓的面前行許個神蹟，
31 百姓就信。𪜶聽見耶和華眷顧以色列人，閣看𪜶的艱苦，就俯頭敬拜。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。