上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
118
為勝利感稱謝耶和華
恁著感謝耶和華，因為伊是好；
因為伊的慈愛永遠佇啲！
2 願以色列講：
伊的慈愛永遠佇啲！
3 願亞倫的家講：
伊的慈愛永遠佇啲！
4 願敬畏耶和華的人講：
伊的慈愛永遠佇啲！
5 我佇危急的中間求叫耶和華，耶和華就應我，
將我下佇寬闊的所在。
6 有耶和華及我佇啲，我就無驚，
人欲啥法得我奈何？
7 佇許個幫助我者的中間，有耶和華及我佇啲，
所以我欲看見許個怨恨我的人受報應。
8 倚靠耶和華，比倚靠人卡好；
9 倚靠耶和華，比倚靠王親卡好。
10 萬百姓圍纍我，
我倚靠耶和華的名欲剿滅𪜶。
11 𪜶圍我，困我，
我倚靠耶和華的名欲剿滅𪜶。
12 𪜶親像蜂圍我，
親像燒莿帕的火，受拍熄；
我倚靠耶和華的名，欲剿滅𪜶。
13 你出力捙我，欲互我倒，
總是耶和華幫助我。
14 耶和華是我的氣力，是我的詩歌；
伊亦成做拯救我的。
15 佇義人的布棚內，有歡喜的聲，拯救的聲；
耶和華的正手施出大權能。
16 耶和華的正手攑高；
耶和華的正手施出大權能。
17 我𣍐致到死，猶會活啲，
續欲報揚耶和華的所做。
18 耶和華曾嚴嚴警戒我，
總是未有將我交佇死無。
19 著給我開義的門；
我欲入去感謝耶和華！
20 這是耶和華的門；
義的人欲入去！
21 我欲感謝你，因為你已經應我，
閣成做拯救我者！
22 師傅所棄拺的石，
已經成做厝角頭的石。
23 這是耶和華所做的，
咱的目睭看伊做奇怪。
24 這是耶和華所定著的日，
咱佇此日的中間欲歡喜快樂！
25 耶和華啊！今求你拯救！
耶和華啊，今求你互阮發達！
26 奉耶和華的名來者應該得著福氣！
阮對耶和華的厝給恁祝福！
27 耶和華是上帝；
伊的光照阮。
著用索縛祭祀的精牲，
到壇角。
28 你是我的上帝，我欲感謝你！
你是我的上帝，我欲尊你做高！
29 恁著感謝耶和華，因為伊是好！
因為伊的慈愛永遠佇啲！
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。