上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
2
摩西的出世
有一個利未族的人去娶一個利未族的查某囝仔。
2 彼個婦仁人懷孕，生一個子，看見伊是清秀的囝仔，就囥伊三月日久，
3 後來看𣍐閣囥得，就為著伊取蘆竹仔的箱，用石油及瀝青糊伊，將囝仔下佇彼內面，橐佇河邊蘆葦的中間。
4 伊的大姐遠遠徛啲，愛知伊會抵著怎樣。
5 法老的查某子落來河裡欲洗浴，伊許個女婢行遊佇河邊。伊看見蘆葦的中間有箱，就差一個女婢夯來。
6 掀開，看見囝仔。看啊，囝仔啲哮，伊就憐憫伊，講：「這就是希伯來人的囝仔。」
7 伊的大姊給法老的查某子講：「我去佇希伯來婦仁人的中間叫一個奶母，給你育此個囝仔，好嗎？」
8 法老的查某子給伊講：「你通去啊！」查某子就去叫囝仔的老母。
9 法老的查某子給伊講：「抱此個囝仔去，給我育伊，我欲互你工錢。」婦仁人就抱囝仔去育伊。
10 囝仔漸漸大，婦仁人就帶伊到法老的查某子遐，做伊的子。伊給伊號名叫摩西，講：「因為我對水裡救伊出來。」
摩西走去米甸
11 後來，摩西已經長成，伊出去到伊的兄弟遐，看見𪜶啲擔壓，看見一個埃及人拍一個希伯來人就是伊的兄弟。
12 伊看左右，看無人佇遐，就拍死埃及人，掩佇沙裡。
13 隔日閣出去，看見有二個希伯來的人相拍，就對彼個著者講：「你啥事拍你的同伴？」
14 彼個人講：「是誰設立你做首領及審判官來管阮？你想欲拍死我，親像拍死彼個埃及人嗎？」摩西驚，講：「此個代誌真正露出。」
15 法老聽見此個代誌，就想欲刣摩西，總是摩西閃避法老，走去米甸地徛起。
16 坐佇井邊。米甸的祭司有七個查某子；𪜶來汲水，到滿槽，互老父的羊群飲。
17 許個顧羊者到，趕𪜶，摩西就起來幫助𪜶，互𪜶的羊群飲。
18 𪜶來到老父流珥遐；伊講：「今仔日恁怎樣許緊倒來？」
19 𪜶講：「有一個埃及人救阮脫離顧羊的人的手，閣替阮出力汲水互羊群飲。」
20 伊對伊許個查某子講：「彼個人佇叨落？恁啥事放伊佇遐？著請伊來食。」
21 摩西願及彼人𫢶；伊就將伊的查某子西坡拉嫁互摩西。
22 生一個子，摩西給伊號名叫革舜，因為講：「我寄腳佇外邦。」
23 歷過多多年，埃及王死。以色列人因為做苦工，就吐氣喉叫，𪜶做苦工喉叫的聲到互上帝聽見。
24 上帝聽見𪜶的譆譆孱，上帝就記得伊及亞伯拉罕、以撒、雅各所立的約。
25 上帝看顧以色列人，上帝也知𪜶的代誌。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。