上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
71
老人的祈禱
耶和華啊，我倚靠你；
求你互我永永無見誚！
2 照你的公義拯救我，互我脫離；
俯耳孔聽我，來救我！
3 求你做我通徛起的石磐，
互我常常去𫢶遐；
你已經命令欲救我，
因為你是我的山巖，我的山寨。
4 我的上帝啊，求你救我脫離歹人的手，
脫離不義及殘忍的人的手頭。
5 因為主──耶和華，你是我所向望的；
對我少年的時，你是我所倚靠的。
6 我對胎裡互你扶持；
互我出老母的腹肚的是你。
我欲常常謳咾你！
7 多多人掠我做奇怪，
總是你是我堅固逃閃的所在。
8 我滿嘴欲謳咾你，
通日欲榮光你。
9 我年老的時，求你通放拺我！
我氣力衰膦的時，求你通離開我。
10 因為我的對敵議論我；
許個當等欲害我的生命者相及參詳，
11 講：上帝已經放拺伊；
今著追趕伊，掠伊！
因為無救伊的。
12 上帝啊，求你通離開我遠遠！
我的上帝啊，求你緊緊來幫助我！
13 願許個做我生命的對敵的，受見誚滅無；
願許個計謀害我的，受凌辱漏氣。
14 總是我欲常常向望，
我欲愈久愈謳咾你。
15 你的公義以及你的拯救算𣍐了，
我的嘴通日欲講起。
16 我欲來講主──耶和華大權能的事；
我單單欲講起你的義。
17 上帝啊，對我少年的時，你有教示我；
到現今，我曾報揚你奇妙的所做。
18 上帝啊，我到年老頭毛白的時，
求你通放拺我！
聽候我將你的氣力指示下代，
將你的大權能指示一切將來的人。
19 上帝啊，你的義真高；
上帝啊，你曾行大的事，是誰會親像你！
20 你是互阮歷過多多大患難的，
你欲互阮閣再活，
也欲救阮對地的深淵起來。
21 求你互我愈高大，
閣倒轉安慰我。
22 我的上帝啊，我欲彈瑟謳咾你，
謳咾你的真實！
以色列的聖者啊，我欲彈琴謳咾你！
23 我唱歌謳咾你的時，
我的嘴唇以及你所救贖我的靈魂欲歡喜出聲；
24 閣我的舌歸日欲講論你的義，
因為許個計謀害我的人已經見誚受凌辱。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。