上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
69 大衛的詩，交互樂官。調是用「百合花。」
求幫助的禱告
上帝啊，求你救我！
因為諸個水欲淹我的生命。
2 我陷落佇深的土糜內，無通徛腳的所在；
我到深的水內，大水淹密我。
3 我因為我的喉叫到厭倦，我的嚨喉乾去；
我因為聽候我的上帝，目睭花。
4 無因端怨恨我的，卡多我的頭毛；
濫糝做我的對敵、欲滅無我的，不止強猛。
我所無搶的，我也著還。
5 上帝啊，我的愚戇，你本知；
我的罪過無隱瞞佇你。
6 萬軍的主──耶和華啊，
求你通互許個聽候你的人，為著我來見誚！
以色列的上帝啊，
求你通互許個尋你的人，為著我來受凌辱！
7 因為我為著你的緣故受詈罵，
我滿面見誚。
8 我的兄弟看我做過路的人；
我的同胞看我做外邦人。
9 因為我為著你的厝，心內親像火𤏸，
閣詈罵你的人的詈罵攏到佇我。
10 我流目屎，用禁食刻苦我的心；
這反轉做我的凌辱。
11 我用麻布做衣裳，
人就用我做笑談。
12 坐佇城門者談論我；
酒漢用我做歌曲。
13 總是我佇得著接納的時對耶和華──你祈禱。
上帝啊，求你照你慈愛的豐盛，
照你拯救的真實來應我！
14 求你救我出土糜，
互我無沈落去；
求你救我脫離怨恨我的人，
互我出深的水。
15 求你莫得容允大水淹密我，
莫得容允深淵吞我，
莫得容允陷坑陷我。
16 耶和華啊，求你應我！
因為你的慈愛是好；
求你照你慈悲的豐盛越過來看我！
17 通掩面看你的奴僕；
因為我佇患難的中間，求你緊緊來應我！
18 求你親近我的靈魂，來救贖伊！
求你因為我的對敵來贖回我！
19 你知我所受的詈罵、見誚、凌辱；
我的對敵攏佇你的面前。
20 詈罵已經拆裂我的心，
我的憂悶滿滿。
我向望人可憐，也無一個；
向望人安慰，也尋無一個。
21 𪜶提苦膽互我做食物；
我嘴乾，𪜶用醋互我飲。
22 願𪜶的筵桌佇𪜶的面前變做羅網，
佇𪜶平安的時變做活罩。
23 願𪜶的目睭黑暗，𣍐看見；
願你互𪜶的腰常常栗栗惙。
24 願你的痛恨傾佇𪜶的身上，
互你烈烈的受氣趇著𪜶。
25 願𪜶徛起的所在變做拋荒；
願𪜶的布棚無人徛起。
26 因為，你所拍彼個人，𪜶就窘迫伊；
你所拍傷許個人，𪜶搬摘𪜶的憂苦。
27 願你佇𪜶的罪上加罪，
莫得容允𪜶有份你的義。
28 願𪜶對活命的冊受擦滅，
無記佇義人的中間。
29 總是我是困苦憂傷的人；
上帝啊，願你的救恩安置我佇高的所在。
30 我欲用詩歌謳咾上帝的名，
也欲用感謝稱伊做大！
31 這是互耶和華歡喜，贏過獻牛，
抑是獻有角有蹄的牛牨。
32 謙卑的人看見就歡喜；
恁尋上帝的人，願恁的心活起來。
33 因為耶和華聽喪鄉的人，
無看輕為著伊受關監的人。
34 願天及地謳咾伊！
海及其中一切的動物也著謳咾伊！
35 因為上帝欲救錫安，起造猶大的城；
𪜶欲徛起佇遐，得著伊做業。
36 伊的奴僕的後裔欲續接伊；
疼伊的名的人欲𫢶佇彼中間。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。