上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
47 約瑟入去給法老講：「我的老父及我的兄弟帶𪜶的羊群牛群，及一切所有的，對迦南地來，今佇歌珊的地。」
2 約瑟對伊的兄弟的中間揀五人，導𪜶去見法老。
3 法老問約瑟的兄弟講：「恁做甚麼頭路？」𪜶給法老講：「你的奴僕本身，及阮的祖公攏是顧羊的人。」
4 𪜶閣給法老講：「迦南地飢荒真傷重，奴僕的羊群無草通食，所以阮來是欲寄腳佇遮。今求你容允你的奴僕𫢶佇歌珊地。」
5 法老給約瑟講：「你的老父及你的兄弟來到你遮，
6 埃及地攏佇你的面前，互你的老父及你的兄弟住佇國內第一好的地；𪜶通住佇歌珊的地。你若知𪜶中間卡有本事的人，就派𪜶管顧我的精牲。」
7 約瑟導伊的老父雅各入去徛佇法老的面前，雅各就給法老祝福。
8 法老問雅各講：「你一生的年日是偌多啊？」
9 雅各給法老講：「我寄腳佇世間的年日是一百三十歲，我一生的年日亦少亦艱苦，值著我的列祖寄腳佇世間的年日。」
10 雅各閣給法老祝福，就對法老的面前出去。
11 約瑟照法老的命令，將埃及國第一好的地，就是蘭塞的地，互伊的老父及伊兄弟徛起，做產業。
12 約瑟用米糧奉承伊的老父及伊的兄弟，及伊的老父全家，攏照𪜶的人額來供給𪜶。
飢荒
13 飢荒真傷重，全地攏無米糧，甚至埃及地及迦南地的人因為飢荒的緣故餓到昏去。
14 約瑟聚集埃及地及迦南地所有的銀，就是𪜶糴米糧的銀，約瑟就將許個銀帶到法老的宮。
15 埃及地及迦南地的銀攏用了，埃及眾人攏來見約瑟，講：「阮的銀攏用了啦，求你互阮米糧，阮啥事著死佇你的面前？」
16 約瑟講：「若是銀用了，恁的精牲通牽來，我為著恁的精牲欲互恁米糧。」
17 𪜶就將精牲趕到約瑟遐；約瑟就用米糧換𪜶的馬、羊群、牛群，及驢；彼年為著換𪜶一切的精牲，就用米糧養飼𪜶。
18 彼年已經過，第二年𪜶閣來見約瑟，給伊講：「阮𣍐瞞得我的主，阮的銀攏用了，精牲亦攏歸佇我的主。阮佇我的主的面前，除阮的身體及阮的田地以外，無剩一項。
19 阮啥事人死，地拋荒佇你的目睭前啊？求你用米糧買阮及阮的地，阮及阮的地做法老的路用。閣用種子互阮，互阮得著活，免死，土地亦免拋荒。」
20 對按呢，約瑟為法老買埃及所有的地，埃及人因為互飢荒所迫，逐人攏賣伊的田地；許個地就攏歸佇法老。
21 約瑟照諸個城邑遷徙埃及的百姓，對埃及此旁到佇彼旁。
22 獨獨祭司的地，法老無買伊，因為祭司有對法老得著定著的糧。𪜶食法老所互𪜶的糧，所以𪜶無賣𪜶的地。
23 約瑟給百姓講：「我今仔日為法老買恁及恁的地，看啊，佇遮有種子互恁，恁通去作田。
24 到收成的時，恁著將五份一納互法老，四份歸恁做田裡的種子，亦做恁及恁家內人的食物，以及恁的囝仔的食物。」
25 𪜶講：「你有救阮的生命。願阮佇我的主的面前得著恩典，阮欲做法老的奴僕。」
26 按呢約瑟為埃及的地設立定著的例，到佇今仔日：法老得著五份的一份，獨獨祭司的地無歸法老。
雅各最後的吩咐
27 以色列人徛起埃及國歌珊的地。𪜶佇遐建置產業，閣生湠極其多。
28 雅各𫢶佇埃及地十七年，雅各一生的年日是一百四十七歲。
29 以色列死的日近啦，伊就叫伊的子約瑟來，給伊講：「我若佇你的面前得著恩典，請你下手佇我的大腿下，用慈愛及誠實款待我，通埋葬我佇埃及。
30 我及我的父公同睏的時，你著將我帶出埃及，埋葬佇𪜶埋葬的地。」約瑟講：「我欲照你的話來行。」
31 雅各講：「你著對我咒誓。」伊就對伊咒誓，對按呢以色列倚床頭敬拜上帝。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。