上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
37 大衛的詩。
義人及歹人的結局
通因為做歹的人心內不平，
亦通怨妒行不義的人。
2 因為𪜶親像草快快割，
閣親像青翠的菜老去。
3 著倚靠耶和華來行好，
𫢶佇此個土地，用誠實做米糧；
4 著掠耶和華做歡喜，
伊欲將你的心所求的互你。
5 著將你的代誌交代耶和華，
閣倚靠伊，伊欲互伊成。
6 伊欲互你的義發出親像光，
你的判斷親像中晝的光。
7 著靜靜佇耶和華的面前，寬心聽候伊；
通因為彼號事事亨通的及彼號歹計謀得著成者來不平。
8 著息受氣，離開大受氣；
通不平，驚了會做歹。
9 因為行歹的人欲受剿滅；
獨獨聽候耶和華的人𪜶欲承接土地。
10 因為閣霎仔久，歹人欲無去；
你若詳細查伊的所在伊亦無去。
11 獨獨謙卑的人欲承接土地，
因為平安豐盛大沈歡喜。
12 歹人設計謀欲害義人，
閣向伊咬嘴齒根。
13 主欲笑伊，
因為看見伊的日子欲到。
14 歹人拔刀開弓，
欲打倒困苦喪鄉的人，
欲刣死行做正直的人。
15 𪜶的刀欲刺入家己的心；
𪜶的弓欲受遏折。
16 義人所有的少少，
贏過多多歹人的富有。
17 因為歹人的手欲受遏折；
獨獨耶和華扶持義的人。
18 耶和華知完全的人的時日；
𪜶的產業欲永遠佇啲。
19 𪜶佇患難的時不致見誚，
佇飢荒的日欲得著飽足。
20 總是歹人欲滅無。
耶和華的對敵欲親像草埔的茂盛；
𪜶欲消無，親像火熏的消無。
21 歹人給人借也無還；
若是義人行憐憫，捨施人。
22 耶和華賜福的人𪜶欲承接土地；
互伊咒詛的人欲受滅無。
23 義人的腳步是耶和華所安置；
閣伊歡喜伊的路。
24 伊雖莽跋倒亦無到歸身摔落去，
因為耶和華用伊的手扶伊。
25 我前少年，今年老，
總是未曾看見義人受放拺，
亦伊的後裔做乞食。
26 伊通日憐憫人，借人；
伊的後裔得著福氣！
27 你著離開歹行好，
才通永遠徛起。
28 因為，耶和華歡喜公平，
無放拺伊聖的百姓；
𪜶永遠受保護，
獨獨歹人的後裔欲受剿滅。
29 義人欲承接土地，
永遠𫢶佇遐。
30 義人的嘴講智慧；
伊的舌談論公平。
31 伊的上帝的律法佇伊的心內；
伊的腳攏𣍐踏脫。
32 歹人偷看義人，
數想刣伊。
33 耶和華無放拺伊佇歹人的手；
當審判的時，亦無定伊的罪。
34 你著聽候耶和華，遵守伊的道路，
伊就高升你，互你承接土地；
歹人受剿滅的時，你欲看見。
35 我曾看見歹人有大勢力，
閣發達親像艷的樹佇伊的本土地。
36 有人對遐經過，看啊，伊無去啦；
我亦尋伊，尋𣍐著。
37 你著詳細看彼個完全的人，看彼個正直的人，
因為和平的人有好的結局。
38 論到犯法的人，欲做一下滅無；
歹人的結局欲受剿滅。
39 總是義人得著救是對耶和華；
當患難的時伊做𪜶的營寨。
40 耶和華幫助𪜶，拯救𪜶；
伊拯救𪜶脫離歹人，來牽救𪜶，
因為𪜶倚靠伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。