上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約伯記
2
撒但閣試探約伯
閣有一日，上帝許個子來家己徛佇耶和華的面前，撒但也來佇𪜶中間，家己徛佇耶和華的面前。
2 耶和華對撒但講：「你對叨落來？」撒但應耶和華講：「我佇地上行來行去，遍行佇遐，對遐來。」
3 耶和華對撒但講：「你有留心佇我的奴僕約伯嗎？因為地上無人親像伊完全閣正直，敬畏上帝，離開諸個歹。你雖然激我攻擊伊，無因端毀壞伊，伊猶原執守伊的純全。」
4 撒但應耶和華講：「用皮換皮，人為著伊的生命，願了伊一切所有的。
5 總是你伸你的手磕著伊的骨及伊的肉，就伊欲當面棄絕你。」
6 耶和華對撒但講：「看啊，伊佇你的手頭，獨獨著留伊的生命。」
7 撒但就對耶和華的面前出去，拍約伯，互伊對腳底到頭殼頂生毒瘡。
8 伊就用瓦片坯來扒身軀，坐佇火灰中。
9 伊的某就對伊講：「你猶久執守你的純全嗎？著棄絕上帝，來死！」
10 若是約伯對伊講：「你講話是親像許個戇的婦仁人所啲講的。怎樣呢！咱對上帝受福氣，豈無對伊受災禍嗎？」佇這一切的事約伯並無對伊的嘴來犯罪。
約伯的朋友來看伊
11 彼時約伯三個朋友聽見伊抵著一切的苦難，逐個對𪜶的所在來，就是提幔人以利法、書亞人比勒達、拿瑪人瑣法，𪜶相約相及來悲傷，安慰伊。
12 𪜶遠遠攑目看，𣍐認得伊，就大聲啼哭。逐人拆裂外衫，向天撒土粉，佇家己的頭殼。
13 𪜶就及伊坐佇土腳七日七暝，無及伊講一句，因為𪜶看見伊的痛苦真大。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。