上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
2
尼希米倒去耶路撒冷
亞達設西王二十年尼散月，有酒佇王的面前，我就進酒互王。我平素佇王的面前未曾有憂悶的面色。
2 王給我講：「你無破病，怎樣面帶憂容啊？這無別項，是你心內有憂悶。」我對按呢真驚。
3 我給王講：「願王萬歲！我的列祖墳墓的所在彼個城拋荒，城門攏互火燒去，我豈可無帶憂容嗎？」
4 王問我講：「你愛求甚麼？」對按呢我祈禱天頂的上帝。
5 我對王講：「王若歡喜，你的奴僕若得著恩典佇你的面前，就求你差我去猶大，到我的列祖墳墓彼個城，我通閣起伊。」
6 彼時王后及王相及坐。王給我講：「你欲行的路站著偌久？甚麼時欲倒來？」王歡喜差我去。我就及伊定著一個期限。
7 我閣給王講：「王若歡喜，請用詔書互我帶去，交河外許個總督准我經過，到猶大；
8 閣用詔書一封，寄互管理王的樹林的官亞薩，教伊互我柴料，通做殿邊營盤的門及城牆，及我所欲住的厝的路用。」王就准我所求的，因為我的上帝施恩的手幫助我。
9 王派幾若個兵頭及馬兵及我去。我到河外許個總督遐，將王的詔書交互𪜶。
10 和倫人參巴拉，及做奴才的亞捫人多比雅，聽見有人來欲為以色列人圖謀利益，就真迫腹。
11 我到耶路撒冷，𫢶遐三日。
12 我透暝起來，有幾若人及我相及；總是我的上帝感動我的心所欲為耶路撒冷做的，我並無給人講。除我騎的精牲以外，也無別隻精牲及我去。
13 我透暝對山谷門出去，到龍井的頭前，也到糞埽門，觀察耶路撒冷的城牆，看見城牆拆毀，城門互火燒去。
14 我閣進前，去到水泉的門及王的池，總是佇遐無一位仔通互我騎的精牲過去。
15 對按呢我透暝沿溪上去，觀察城牆，閣越轉身對山谷的門入去，才倒來。
16 許個官長知我去叨落，做甚麼事。我猶未有給猶大的百姓、祭司、貴族、官長，及其餘做工的人講。
17 後來，我給𪜶講：「咱所抵著的患難，耶路撒冷怎樣拋荒，城門互火燒，恁攏看見。來啊，咱閣起耶路撒冷的城牆，免得咱閣受凌辱！」
18 我給𪜶講我的上帝的手怎樣幫助我，及王對我講甚麼話。𪜶講：「咱起來起造！」對按呢𪜶奮勇做此個好的工。
19 總是和倫人參巴拉，及做奴僕的亞捫人多比雅及亞拉伯人基善聽見就恥笑阮，看輕阮，講：「恁所做是甚麼？欲背叛王嗎？」
20 我應𪜶講：「天頂的上帝伊欲互阮興起。阮做伊的奴僕者，欲起來起造；總是恁佇耶路撒冷無份、無權、無名字。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。