上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
34
猶大國的王約西亞
( 王下 22:1-2 )
約西亞坐位的時八歲，佇耶路撒冷做王共三十一年。
2 伊行耶和華所看做好的事，行伊的祖大衛一切的路，無偏左右。
約西亞攻擊外邦的崇拜
3 伊做王第八年，猶久少年，起頭尋伊的祖大衛的上帝。到十二年起頭清氣猶大及耶路撒冷，除去山頭壇，及許個亞舍拉，雕刻的像及鑄造的像。
4 𪜶佇伊的面前毀壞許個巴力的壇，伊剉斷壇頂高高的日像，閣拍碎許個亞舍拉及雕刻的像，及鑄的偶像搥伊做粉，撒佇曾祭祀伊的的墓，
5 將𪜶的祭司的骨頭燒佇𪜶的壇頂，清氣猶大及耶路撒冷；
6 佇瑪拿西、以法蓮、西緬、到佇拿弗他利許個城及四圍破壞的所在，攏也按呢行；
7 閣拆毀祭壇，拍碎亞舍拉，及雕刻的像成做粉，剉斷以色列遍地所有的日像，就倒去耶路撒冷。
發現律法書
8 ( 王下 22:3-20 )
約西亞王十八年，清氣地清氣殿以後，就差亞薩利雅的子沙番、城守瑪西雅、史官約哈斯的子約亞去修理耶和華──伊的上帝的殿。
9 𪜶就去見祭司頭希勒家，將所有獻佇上帝殿的銀交伊；此個銀是顧門的利未人對瑪拿西、以法蓮，及一切以色列剩的人，以及猶大、便雅憫眾人，及耶路撒冷徛起的百姓收來的。
10 𪜶將彼個銀交互管理耶和華殿做工人的手，轉交耶和華殿做工的人修理殿互伊好勢，
11 就是交互木匠、起造的，互𪜶買過拍的石及連絡的柴料，修理猶大王所毀壞許個厝。
12 許個人盡忠做工，督工者是利未人米拉利的子孫雅哈、俄巴底；督催者是哥轄的子孫撒迦利亞、米書蘭；閣有作樂的利未人。
13 𪜶也管理許個擔壓的人，督催一切做工的，無論做甚麼工。利未人有的做書記、做有司、做管門者。
14 𪜶將所有獻佇耶和華殿的銀帶出去的時，祭司希勒家偶然得著摩西所傳耶和華律法的冊。
15 希勒家應書記沙番講：「我佇耶和華殿內偶然得著律法的冊。」希勒家就將冊交互沙番。
16 沙番就帶冊去王遐，閣回覆王講：「見若你所託仗你的奴僕的𪜶啲做伊。
17 所得著佇耶和華殿的銀攏傾出來，交互督工者及做工人的手。」
18 書記沙番閣對王講：「祭司希勒家有提一本冊互我。」沙番佇王的面前摘讀伊。
19 王聽見律法的話，就拆裂伊的衫，
20 王吩咐希勒家及沙番的子亞希甘、米迦的子亞比頓、書記沙番，及王的近臣亞撒雅講：
21 「恁去為我、為以色列及猶大所留的百姓，將所拾著此本冊的話問耶和華；因為耶和華的受氣大大傾落佇咱，是為著咱的列祖無守耶和華的話，無照此本冊一切所記載的去行。」
22 對按呢，希勒家及王所託的人攏去見女先知戶勒大。伊是哈斯拉的孫、特可哈的子，管理禮服彼個沙龍的某。伊𫢶佇耶路撒冷第二區；𪜶將此個意思給伊講。
23 伊應𪜶講：「耶和華──以色列的上帝按呢講：『恁去回覆彼個差恁來見我的人講，
24 耶和華按呢講：看啊！我欲降災禍佇此所在，以及佇遮徛起的百姓，就是𪜶讀佇猶大王面前的冊所記載許個咒詛；
25 因為𪜶棄拺我，燒香佇別個上帝，用𪜶的手所做的激我的受氣，所以我的大受氣傾落佇此所在無息。』
26 總是差恁來問耶和華的猶大王，恁著按呢給伊講：『耶和華──以色列的上帝按呢講：論到你所聽見的話，
27 你的心就軟，家己謙卑佇上帝的面前，因為你聽見伊所講攻擊此所在及佇遮徛起的百姓的話，彼時你佇我的面前家己謙卑，閣拆裂你的衫，佇我的面前啼哭，我已經聽見你。這是耶和華講的。
28 我欲互你歸你的列祖，你欲平安歸墓，我所欲降落佇此所在及佇遮徛起的百姓一切的災禍，你的目睭的確𣍐看見。』」𪜶就倒轉去回覆王。
約西亞立約順趁耶和華
29 ( 王下 23:1-20 )
王就差人聚集猶大及耶路撒冷的眾長老。
30 王就上去耶和華的殿，猶大眾人及徛起耶路撒冷的百姓，及祭司利未人，及眾百姓，無論大細，攏及伊去；王就將耶和華殿內偶然得著約的冊一切的話讀互𪜶聽。
31 王徛佇伊的位，佇耶和華的面前立約，欲盡心盡性順趁耶和華，守伊的誡命，及干證的話，及律例，來成此本冊所記立約的話；
32 伊互耶路撒冷及便雅憫所有的百姓攏承認此個約。對按呢耶路撒冷徛起的百姓照上帝的約來行，就是𪜶列祖的上帝。
33 約西亞將屬以色列人許個地，一切可惡的攏除去，閣互所有佇以色列的人服事耶和華──𪜶的上帝。當約西亞佇啲的日，百姓趁耶和華──𪜶列祖的上帝，攏無離開。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。