上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
33
猶大國的王瑪拿西
( 王下 21:1-9 )
瑪拿西坐位的時十二歲，佇耶路撒冷做王共五十五年。
2 伊行耶和華所看做歹的事，學外邦人所行可惡的事就是耶和華佇以色列的面前所趕出的，
3 因為伊的老父希西家所毀壞的山頭壇伊閣起伊，閣為許個巴力起壇，做亞斯他錄，閣敬拜天頂的萬象來服事伊，
4 佇耶和華的殿內起幾若個壇──耶和華曾指此個殿講：「我的名欲永遠佇耶路撒冷。」
5 伊佇耶和華的殿二個院內為著天頂的萬象起壇，
6 閣佇便欣嫩的山谷互伊的子兒經過火，閣看兆頭，用法術，做徼，用跳童者，請師公行多多耶和華所看做歹的事，激伊受氣，
7 閣佇上帝的殿內祀伊所造雕刻的像。此間殿是上帝曾對大衛及伊的子所羅門指伊來講：「此間殿及耶路撒冷就是我佇以色列眾支派中所揀的，我欲安置我的名佇遐到永遠。
8 以色列人若執守來行我一切所命令𪜶的就是我託摩西所傳一切的法度、律例、禮儀，我就無閣移徙𪜶的腳離開我所定著互恁列祖的地。」
9 瑪拿西迷惑猶大及耶路撒冷徛起的百姓致到𪜶行歹比耶和華佇以色列人的面前所滅的列國閣卡傷重。
瑪拿西悔改
10 耶和華吩咐瑪拿西及伊的百姓，總是𪜶無欲聽。
11 所以耶和華互亞述王的軍長來攻擊𪜶，用鈎鈎著瑪拿西，用銅鍊縛伊，帶到巴比倫。
12 伊佇患難的時，就懇求耶和華──伊的上帝，閣佇伊的列祖的上帝的面前極其謙卑。
13 伊求叫伊，上帝准伊所求，聽伊祈禱，互伊倒來耶路撒冷，猶原坐伊的國位。瑪拿西才知耶和華是上帝。
14 此霎了後，瑪拿西起牆佇大衛的城外，佇基訓的西旁佇山谷內到魚門的門口，圍踅俄裴勒，牆起真高；閣設立軍長佇猶大許個堅固的城內；
15 閣對耶和華的殿除去許個外邦的上帝及偶像，閣佇耶和華殿的山及耶路撒冷所起許個壇攏㧒佇城外；
16 閣起耶和華的祭壇，佇壇頂獻謝恩祭、感謝祭，命令猶大人服事耶和華──以色列的上帝。
17 總是百姓猶原佇山頭壇獻祭，獨獨獻互耶和華──伊的上帝若定。
瑪拿西死
18 ( 王下 21:17-18 )
瑪拿西其餘的事及伊祈禱上帝的話，及先見奉耶和華──以色列的上帝的名對伊講許個話，攏記佇以色列諸個王的記錄。
19 伊的祈禱，及上帝怎樣允准伊，伊未謙卑以前的罪過過失，及起山頭壇設立許個亞舍拉及雕刻偶像許個所在，攏記佇何賽的史記。
20 瑪拿西及伊的列祖同睏，埋葬佇家己的宮內。伊的子亞們續接伊做王。
猶大國的王亞們
21 ( 王下 21:19-26 )
亞們坐位的時二十二歲，佇耶路撒冷做王歷過二年。
22 伊行耶和華所看做歹的事，學伊的老父瑪拿西所做的，亞們祭祀伊的老父瑪拿西所造許個雕刻的偶像來服事伊，
23 無家己謙卑佇耶和華的面前，親像伊的老父瑪拿西的家己謙卑。此個亞們愈久愈犯罪。
24 伊的人臣背叛伊，刣死伊佇王宮內。
25 總是國民刣死許個背叛亞們王的人，國民就設立伊的子約西亞續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。