上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
29
猶大國的王希西家
( 王下 18:1-3 )
希西家坐位的時二十五歲，佇耶路撒冷做王共二十九年。伊的老母名叫亞比雅，是撒迦利雅的查某子。
2 伊行耶和華所看做好的事，照伊的祖大衛一切所行的。
清氣聖殿
3 佇元年正月，開耶和華殿的門，修理伊。
4 伊召許個祭司及利未人來，聚集佇東勢闊的所在，
5 給𪜶講：「利未人啊，著聽我講：今恁著清氣家己，也著清氣耶和華──恁列祖的上帝的殿，對聖所傾出許個污穢。
6 因為咱的列祖有犯罪，行耶和華──咱的上帝所看做歹的事，離開伊，越轉伊的面，背耶和華徛起的所在，
7 𪜶閣關鎖兩廊的門，拍熄燈火，無佇聖所燒香，獻燒祭互耶和華──以色列的上帝。
8 所以，耶和華受氣臨到猶大及耶路撒冷，互𪜶漂流，互人卬愕、恥笑，親像恁親目所看見的。
9 因為按呢阮的父公受刀刣，阮的子查某子及阮的某也互人掠去。
10 今我的心欲及耶和華──以色列的上帝立約，互伊的大受氣越轉離開咱。
11 我諸個子啊，今通貧憚；因為耶和華揀恁徛佇伊的面前服事伊，擔當責任燒香互伊。」
12 對按呢，利未人哥轄族亞瑪賽的子瑪哈，亞撒利雅的子約珥；米拉利族亞伯底的子基士，耶哈利勒的子亞撒利雅；革順族薪瑪的子約亞，約亞的子伊甸；
13 以利撒反的族申利及耶利；亞薩族撒迦利雅及瑪探雅；
14 希幔族耶歇及示每；耶杜頓族示瑪雅及烏設攏起來；
15 聚集𪜶的兄弟，清氣家己，照王趁耶和華的話所命令的，入去洗清耶和華的殿。
16 祭司入耶和華殿的內面欲洗清伊，將耶和華殿內所有的污穢帶出去到耶和華殿的院，利未人接伊，帶去外面到汲淪溪。
17 對正月初一日起手行清氣的事，彼月的初八日才到耶和華的兩廊，八日久清氣耶和華的殿，到正月十六日就明白。
重新奉獻聖殿
18 對按呢，𪜶入去見希西家王，講：「阮已經將耶和華的歸間殿及燒祭的壇以及伊的器具，排列餅的桌，及伊的器具攏洗清；
19 閣亞哈斯王坐位犯罪的時所棄拺的器具，阮攏備辦，閣清氣伊。看啊，今攏佇耶和華的壇前。」
20 希西家王透早起來，聚集城內的首領攏上耶和華的殿；
21 𪜶牽七隻牛牨，七隻羊牨，七隻綿羊仔，七隻山羊牨，欲為國、為聖所、為猶大獻做贖罪的祭。王命令亞倫的子孫許個祭司，獻𪜶佇耶和華的壇，
22 𪜶就刣牛牨，祭司接彼個血灑佇壇裡，也刣羊牨，用血灑佇壇裡，閣刣綿羊仔，也用血灑佇壇裡；
23 用許個做贖罪祭的山羊牨牽到王及會眾的面前，𪜶就按手佇彼頂面。
24 祭司刣伊，用𪜶的血做贖罪的祭佇壇裡，為以色列眾人贖罪，因為王命令著用燒祭及贖罪祭為以色列眾人來獻。
25 王閣派利未人佇耶和華的殿提鈸，瑟琴，照大衛及王的先見迦得，及先知拿單所命令的，因為耶和華有託仗伊許個先知命令𪜶按呢。
26 利未人提大衛的樂器，祭司攑號頭，相及啲徛。
27 希西家命令獻燒祭佇壇裡，燒祭一下獻，就唱謳咾耶和華的歌，用號頭，閣用以色列王大衛的樂器來和伊。
28 會眾攏敬拜，唱歌的唱伊，歕號頭的歕伊，按呢到燒祭獻明白。
29 獻明白，王及一切相及佇啲的人攏俯頭敬拜。
30 希西家王及許個首領閣命令利未人用大衛及先見亞薩的詩謳咾耶和華；𪜶就歡喜吟詩謳咾，俯頭敬拜。
31 希西家就應講：「恁已經家己分別歸互耶和華，著近前來帶祭物及謝恩祭到耶和華的殿。」會眾就帶祭物及謝恩祭來，見若甘心樂意的也帶燒祭來。
32 會眾所獻燒祭的額計共：牛牨七十隻，羊牨一百隻，綿羊仔二百隻，諸個攏是做燒祭獻互耶和華的；
33 閣有分別做聖的物，牛牨六百隻，綿羊三千隻。
34 總是祭司甚少，𣍐會一盡剝許個燒祭精牲的皮，所以𪜶的兄弟利未人幫助𪜶，到彼個代誌明白，閣聽候許個祭司家己清氣；因為利未人誠心家己清氣，贏過祭司。
35 燒祭及謝恩祭的油，及逐號燒祭所配的灌奠真多。按呢，耶和華殿內的事照次序排列。
36 希西家及眾百姓歡喜，因為上帝替百姓所備辦的因為此個事忽然成。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。