上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
25
猶大國的亞瑪謝
( 王下 14:2-6 )
亞瑪謝坐位的時二十五歲，佇耶路撒冷做王共二十九年。伊的老母名叫約耶但，是耶路撒冷人。
2 亞瑪謝行耶和華所看做好的事，總是心無專一。
3 伊的國權已經堅固，就刣死前刺客伊的老父猶大王許個人臣，
4 總是無刣死𪜶的子，是照摩西律法的冊所記載耶和華命令講：「通因為子來刣死老父，也通因為父來刣死子，逐人著因為本身的罪來死。」
及以東交戰
5 ( 王下 14:7 )
亞瑪謝聚集猶大人，照猶大及便雅憫的宗族設立千總、百總來導𪜶，閣算人額，對二十歲以上，得著過揀的兵會攑槍捾盾牌上陣的共三十萬；
6 閣用銀一百他連得，對以色列招募大能力的勇士十萬人。
7 有上帝的奴僕來見伊，講：「王啊，莫得互以色列的軍兵及你去，因為耶和華無及以色列人就是以法蓮的後裔佇啲。
8 你若一定欲去，就著奮勇爭戰！上帝欲互你敗佇對敵的面前；因為上帝有權會幫助人，也會捙倒人。」
9 亞瑪謝問上帝的奴僕講：「我已經用銀一百他連得互以色列的軍隊，許個欲怎樣啊？」上帝的奴僕應講：「耶和華會用比諸個卡多互你。」
10 對按呢亞瑪謝分別對以法蓮來的軍兵互𪜶倒去𪜶兜。所以，𪜶真受氣猶大人，氣咈咈倒去𪜶兜。
11 亞瑪謝家己奮勇，導伊的百姓出去到鹽的山谷，刣死西珥人一萬。
12 猶大人閣活掠一萬人帶到山崁頂，對山崁頂給𪜶捙落去，致到𪜶攏碎碎。
13 亞瑪謝所差倒去許個軍隊，准𪜶及伊去交戰的，𪜶攻擊猶大許個城，對撒瑪利亞到伯‧和崙，刣死三千人，搶多多物。
14 亞瑪謝刣以東人倒來，就帶西珥族許個上帝立伊做家己的上帝，跪拜佇伊的面前燒香互伊。
15 因為按呢，耶和華大受氣亞瑪謝，就差一個先知去見伊，講：「許個百姓的上帝𣍐會救𪜶的百姓脫離你的手，你啥事求𪜶啊？」
16 伊及伊講的時，王給伊講：「阮豈設立你做王的謀士啊？你恬恬！啥事討拍啊？」先知就恬恬，閣講：「我知上帝定著意思欲滅你，因為你做此個，聽我的勸戒。」
及以色列爭戰
17 ( 王下 14:8-20 )
彼時猶大王亞瑪謝參詳，差使者去見耶戶的孫、約哈斯的子、以色列王約阿施，講：「來啊，咱二人相見面佇戰場。」
18 以色列王約阿施差使者去見猶大王亞瑪謝，講：「黎巴嫩的草茦差使者去見黎巴嫩的柏香樹，講：『用你的查某子互我的子做某。』後來黎巴嫩有一隻野獸經過，𧿬踏彼個草茦。
19 今你講：『你已經拍贏以東』，你的心就驕，致到你誇口。你佇家內安然徛起就好，啥事起事惹災禍互你本身及猶大國相及倒壞啊？」
20 總是亞瑪謝肯聽。因為此個事是出佇上帝，欲將𪜶交佇對敵的手，因為𪜶尋以東許個上帝。
21 對按呢以色列王約阿施上來，佇猶大的伯‧示麥及猶大王亞瑪謝相見面佇戰場。
22 猶大刣輸佇以色列的面前，逐人走倒去𪜶的布棚。
23 以色列王約阿施佇伯‧示麥掠著約哈斯的孫、約阿施的子、猶大王亞瑪謝，帶伊到耶路撒冷，閣拆毀耶路撒冷的城牆，對以法蓮門到角門，共四百肘；
24 取上帝殿內俄別‧以東所顧守的金銀器具，及王宮的財寶，閣掠人做准當，就倒去撒瑪利亞。
25 以色列王約哈斯的子約阿施死了後，猶大王約阿施的子亞瑪謝猶活十五年。
26 亞瑪謝其餘的事，對頭到尾豈無攏記佇猶大及以色列諸個王的記錄嗎？
27 對亞瑪謝偏離無隨耶和華了後，佇耶路撒冷有人結黨欲害伊，伊就走到拉吉；𪜶差人趇伊到拉吉，佇遐刣死伊。
28 人就用馬載伊倒來，及伊的列祖埋葬佇猶大的城。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。