上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
10
北方支族的反叛
( 王上 12:1-20 )
羅波安去示劍，因為以色列眾人到示劍，欲設立伊做王。
2 前尼八的子耶羅波安閃避所羅門王的面，走去埃及，𫢶佇遐；耶羅波安聽見此個事，就對埃及倒來。
3 𪜶差人去叫伊來，耶羅波安就及以色列眾人來見羅波安；
4 給伊講：「你的老父互阮背艱苦的軛；你的老父所下佇阮的苦工及重的軛，求你減輕，阮就服事你。」
5 羅波安給𪜶講：「三日後閣來見我！」百姓就去。
6 羅波安的老父所羅門活啲的時，有跟隨佇伊面前的老人，羅波安王及𪜶議論，講：「恁有甚麼計策，我通回覆此個百姓。」
7 𪜶給伊講：「你若好款待此個百姓，互𪜶歡喜，用好話來應𪜶，𪜶就永遠做你的奴僕。」
8 總是伊拒絕老人所互伊的計策，及許個徛佇伊面前及伊平勻的少年人參詳，
9 給伊講：「此個百姓有對我講：『你的老父下佇阮的軛，求你互阮卡輕』；今恁有甚麼計策，互咱通回覆𪜶。」
10 許個及伊平勻的少年人講：「此個百姓對你講：『你的老父互阮背重的軛求你給阮減輕』；你著按呢應𪜶講：『我的尾指卡大我的老父的腰；
11 我的老父互恁背重的軛，我欲加添恁的軛；我的老父用鞭警戒恁，我欲用蠍仔蟲警戒恁。』」
12 第三日，耶羅波安及眾百姓到羅波安遐，照王所命令講「第三日閣來我遮」。
13 王用歹聲嗽應百姓，羅波安王放拺老人的計策，
14 照少年人的計策對𪜶講：「我的父互恁背重的軛，我欲加添恁的軛；我的父用鞭警戒恁，我欲用蠍仔蟲警戒恁。」
15 王無聽趁百姓；因為此個代誌是出佇上帝，互耶和華應驗伊託示羅人亞希雅對尼八的子耶羅波安所講的話。
16 以色列眾百姓看見王無聽趁𪜶，百姓就對王講：
阮佇大衛有甚麼份額啊？
阮及耶西的子無干涉！
以色列啊，逐人倒去恁的布棚！
大衛啊，著顧你家己的厝！
對按呢，以色列眾人倒去𪜶的布棚。
17 總是徛起猶大諸個城的以色列人，羅波安猶原做𪜶的王。
18 羅波安王差管理做苦工的人哈多蘭去，以色列人就用石頭擲死伊。羅波安王就趕緊上車，欲走去耶路撒冷。
19 對按呢，以色列反叛大衛家，到今仔日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。