上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
12
早期跟隨大衛的便雅憫人
大衛因為驚基士的子掃羅，守啲敢出去的時，有諸個勇士來到洗革拉尋伊幫助伊交戰。
2 𪜶𠢕開弓，會用倒手正手㧒石頭射箭，攏是便雅憫人掃羅的同族。
3 頭一個是亞希以謝，閣有約阿施，攏是基比亞人示瑪的子。閣有耶設及毗力是亞斯瑪威的子，閣有比拉迦，及亞拿突人耶戶，
4 基遍人以實買雅（佇三十人中是勇士，也啲管彼三十人），閣有耶利米、雅哈悉、約哈難，及基得拉人約撒拔，
5 伊利烏賽、耶利摩、比亞利雅、示瑪利雅、哈律弗人示法提雅，
6 可拉人以利加拿、耶西亞、亞薩列、約以謝、雅朔班，
7 基多人耶羅罕的子猶拉及西巴第雅。
跟隨大衛的迦得人
8 迦得支派有幾若人到曠野的衛所歸倚大衛，𪜶攏是勇士戰士，會出陣夯屏牌攑槍。𪜶的面親像獅的面，𠢕走親像山裡的鹿。
9 頭一個以設，第二俄巴底雅，第三以利押，
10 第四彌施瑪拿，第五耶利米，
11 第六亞太，第七以利業，
12 第八約哈難，第九以利薩巴，
13 第十耶利米，第十一末巴奈。
14 諸個攏是迦得人也攏是軍長，上𣍐者會抵當一百人，上會者會抵當一千人。
15 正月，約但河水漲滿雙旁岸的時，𪜶過河，互一切𫢶佇山谷的人走東走西。
跟隨大衛的便雅憫人及猶大人
16 閣有便雅憫猶大人來到衛所尋大衛。
17 大衛出去迎接𪜶，對𪜶講：「恁若是為著平安來幫助我，我及恁的心就相契合；總是恁若欲將我無罪的人賣佇對敵的手，願咱列祖的上帝鑑察責罰。」
18 彼時上帝的神臨到諸個將的頭人亞瑪撒，伊就講：
大衛啊，阮是歸佇你者！
耶西的子啊，阮是幫助你者！
願你平平安安，
願幫助你者也得著平安！
因為你的上帝幫助你。
大衛就收留𪜶，設立𪜶做軍長。
跟隨大衛的瑪拿西人
19 大衛從前及非利士出陣，欲攻擊掃羅的時，有瑪拿西支派幾若人來歸倚伊，總是到尾𪜶無幫助𪜶；因為非利士的頭人有議論，著互伊倒去，講：「伊的確歸伊的主人掃羅，致到咱的頭殼危險。」
20 彼時大衛去洗革拉，有瑪拿西人的千總押拿、約撒拔、耶疊、米迦勒、約撒拔、以利戶、洗勒太攏來歸倚伊。
21 諸個人幫助大衛攻擊土匪；𪜶攏是大氣力的勇士，閣做軍長。
22 彼時日日有人歸倚大衛欲幫助伊，就成做大軍隊，親像上帝的軍隊一樣。
大衛的軍力
23 備辦交戰的軍隊到希伯崙見大衛，欲照耶和華的話移徙掃羅的國位互大衛。𪜶的數額記佇下面：
24 猶大支派，夯屏牌攑槍備辦交戰的有六千八百人。
25 西緬的支派，會出陣的勇士有七千一百人。
26 利未支派四千六百人。
27 耶何耶大是亞倫的家的首領，隨伊者有三千七百人。
28 閣有少年人撒督是大勇士，及伊本家的族長二十二人。
29 便雅憫的支派，就是掃羅的同族三千人，因為到彼時此族大半猶久擁護掃羅的家。
30 以法蓮支派的大勇士，佇本族出名者有二萬連八百人。
31 瑪拿西半支派，記名者共一萬八千，攏來設立大衛做王。
32 以薩迦支派，有智識、識時勢，知以色列所著行者𪜶的頭人有二百；𪜶的兄弟攏趁𪜶的命令。
33 西布倫有會出陣者，攏𠢕交戰會用逐樣的軍器者，有五萬人，𪜶會排隊伍，無二樣心。
34 屬拿弗他利者，有一千個軍長；夯屏牌、攑槍來隨𪜶者有三萬七千人。
35 但的支派，會排陣的二萬八千六百人。
36 屬亞設的，會出軍排陣的有四萬人。
37 約但河的東旁流便人、迦得人、瑪拿西半支派的人，攑逐樣的軍器來交戰的有十二萬人。
38 諸個戰士攏會排隊伍，誠實心到希伯崙，欲設立大衛做以色列全國的王。以色列其餘的人也同一樣的心欲設立大衛做王。
39 𪜶𫢶遐三日久，及大衛相及𫢶也飲也食，因為𪜶的兄弟給𪜶備辦便便。
40 倚近𪜶的人直到以薩迦、西布倫、拿弗他利的人將驢、駱駝、騾、牛，載麵粉食物，及無花果餅、葡萄干、酒、油來遐，也有帶牛羊攏真多，因為佇以色列中有大歡喜。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。