上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
34
底拿受辱
利亞給雅各所生的查某子底拿，出去欲見彼所在的查某囝仔。
2 彼所在的牧伯希未人、哈抹的子示劍看見伊，就搝伊，及伊相及睏，凌辱伊。
3 伊的心戀慕雅各的查某子底拿，疼此個查某子，用好話安慰伊。
4 示劍給伊的老父哈抹講：「求你給我聘此個查某囝仔做某。」
5 雅各聽見伊拍垃墋伊的查某子底拿。彼時伊許個子及伊的精牲佇山裡，雅各靜靜無做聲，聽候𪜶倒來。
6 示劍的老父哈抹出來見雅各，欲及伊講話。
7 雅各許個子聽見此個代誌，就對山裡倒來，逐個甘願，十分受氣；因為示劍佇以色列做出見誚的代誌，及雅各的查某子相及睏，這本是應該做的事。
8 哈抹及𪜶參詳講：「我的子示劍的心欣慕恁的查某囝仔，求恁將伊互我的子做某。
9 恁及阮大家結親，恁通將恁的查某子互阮，恁亦通娶阮的查某子。
10 恁及阮相及徛起！地佇恁的面前，恁住遮徛，做生理，建置產業。」
11 示劍對查某囝仔的老父及伊的兄弟講：「願佇你的面前得著恩典，恁所對我講的，我欲互恁。
12 出在恁欲對我討偌多聘金及禮物，我的確照恁所講的互恁；只有愛恁用查某囝仔互我做某。」
13 雅各許個子因為示劍拍垃墋𪜶的小妹底拿，就用奸詐的話來應示劍及伊的老父哈抹，
14 對𪜶講：「將阮的小妹互無受割禮的人做某，這個代誌阮𣍐做得，因為彼是阮的見誚。
15 恁所有的查甫人若攏受割禮親像阮一樣，有此一項才通應允恁，
16 阮就將阮的查某子互恁，阮亦娶恁的查某子；阮就及恁相及住，成做一個百姓。
17 設使恁聽阮的話來受割禮，阮就帶阮的小妹來去。」
18 哈抹及伊的子示劍歡喜𪜶的話。
19 彼個少年人做此個代誌攏無延迁，因為伊疼雅各的查某子；閣伊佇𪜶老父的家第一尊貴。
20 哈抹及伊的子示劍來到本城的門口，給本城的人講：
21 「諸個人及咱和好，值著准𪜶佇此個地徛起，做生理；閣此個地亦開闊，會容允得𪜶。咱通娶𪜶的查某子做某，亦通將咱的查某子嫁互𪜶。
22 獨獨著有一項，許個才欲允咱及咱徛起，成做一個百姓：就是咱中間所有的查甫人攏著受割禮，親像𪜶受割禮一樣。
23 伊的牛、羊、財產，及一切的精牲豈無攏歸佇咱嗎？只有著允𪜶，𪜶就欲及咱住。」
24 見若對城門出來的人攏聽趁哈抹及伊的子示劍的話；對按呢見若對城門出來的查甫人攏受割禮。
25 到第三日，眾人當啲痛疼的時，雅各二個子，就是底拿的兄西緬及利未，攏攑刀，趁人無張持來到城內，刣死攏總的查甫人，
26 也用刀刣死哈抹及伊的子示劍，導底拿對示劍的厝出來就去。
27 雅各許個子，為著𪜶小妹受拍垃墋，就來到受刣的人遐，搶劫𪜶的城，
28 搶𪜶的羊群、牛群，及驢，以及城內及田裡所有的；
29 閣將𪜶一切的貨物錢財、一切的囝仔、及婦仁人，以及逐塊厝所有的，攏搶掠就去。
30 雅各給西緬及利未講：「恁連累我，互我佇此所在徛起的百姓的中間，就是佇迦南人及比利洗人的中間，有臭名。閣我的人額少，𪜶的確聚集來攻擊我、拍我，我及全家的人攏會滅無。」
31 𪜶講：「伊豈通款待阮小妹親像娼妓嗎？」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。