| 章節 | 台語漢字本聖經 請按此下載安裝Open Han 2024版字型，免得漏掉造字 |
| 36:1 | 承接查某子出嫁的條例 屬約瑟的子孫諸個家，瑪拿西的孫，瑪吉的子基列的子孫許個族長，來到摩西及以色列人諸個族長諸個首領的面前，講： |
| 36:2 | 「耶和華曾命令我的主拈鬮分地互以色列人做業，我的主也受著耶和華的命令將阮的兄弟西羅非哈的產業分互伊許個查某子。 |
| 36:3 | 𪜶若嫁以色列別支派的人，𪜶的產業就對阮祖公所留的產業撥過去加添佇𪜶所欲屬的支派的產業。按呢，就對阮拈鬮所得著的業撥過去。 |
| 36:4 | 到以色列人的禧年，𪜶的產業就加添佇𪜶所欲屬的支派的產業。按呢，𪜶的產業就是對阮祖公支派的產業撥過去。」 |
| 36:5 | 摩西照耶和華的話命令以色列人講：「約瑟子孫的支派所講的是著。 |
| 36:6 | 論到西羅非哈諸個查某子，耶和華按呢命令講：𪜶通嫁𪜶合意的人，獨獨著嫁互𪜶老父同宗支派的人。 |
| 36:7 | 按呢，以色列人的產業就無對此支派歸到彼支派，因為以色列人著逐個執守𪜶祖公支派的產業。 |
| 36:8 | 見若佇以色列支派中得著產業的查某子，著做伊的老父同宗支派的人的某，通互以色列人的支派逐個執守𪜶的祖公的產業。 |
| 36:9 | 按呢，𪜶的產業就無對此支派歸到彼支派，因為以色列人的支派欲逐個執守𪜶的產業。」 |
| 36:10 | 耶和華按呢吩咐摩西，西羅非哈的查某子就按呢行。 |
| 36:11 | 因為西羅非哈的查某子瑪拉、得撒、曷拉、密迦、羅阿攏嫁𪜶的叔伯的子。 |
| 36:12 | 𪜶嫁佇約瑟的子、瑪拿西子孫許個家；就𪜶的產業猶原留佇𪜶老父的家的支派。 |
| 36:13 | 諸個是耶和華佇摩押平洋──約但河邊、耶利哥對面──託摩西所吩咐以色列人的命令、法度。 |