| 章節 | 現代台語漢字2021版經文 |
| 11:1 | 佇他備拉發怨言 以色列人民發怨言，𪜶的不滿傳到上主遐；上主聽著，就發大受氣。上主降火佇𪜶中間，燒營地的外圍。 |
| 11:2 | 人民對摩西哀求，摩西就祈求上主；火就化。 |
| 11:3 | 彼個所在就叫做他備拉，因為上主佇遐降火燒𪜶。 |
| 11:4 | 摩西選七十個長老 𪜶中間的外族人數想欲食好物；以色列人嘛啼哭講：「若有肉通食毋知偌好咧？ |
| 11:5 | 阮會記得佇埃及食魚免錢，閣有刺瓜、西瓜、韭菜、葱頭、蒜頭。 |
| 11:6 | 阮已經無元氣啦，因為嗎哪以外，阮攏無物件通食。」 |
| 11:7 | 嗎哪親像芫荽籽，色緻親像真珠。 |
| 11:8 | 人民四界去拾，有的用石槌研，有的用舂臼舂，用鍋仔煮，作做餅；滋味親像抄油的餅。 |
| 11:9 | 暝時嗎哪及露水做夥落佇營內。 |
| 11:10 | 摩西聽著人民家家戶戶佇布棚口啲哮。上主真受氣，摩西嘛無歡喜。 |
| 11:11 | 摩西對上主講：「你是按怎歹款待你的僕人？我是按怎無得著你的恩典，你竟然將所有人民的擔下佇我的肩頭頂？ |
| 11:12 | 此個人民豈是我懷孕的？豈是我生的？你竟然叫我著給𪜶抱佇胸前，親像老父啲育飼食奶的嬰仔，到𪜶進入你宣誓欲賞賜𪜶祖先的地？ |
| 11:13 | 我欲去叨位提肉來互所有的人民食？因為𪜶攏哭賴我，講：『互阮有肉通食！』 |
| 11:14 | 此個人民的擔傷重，我家己擔當𣍐起。 |
| 11:15 | 你若按呢對待我，我若對你得著恩典，求你隨時給我刣死，互我免閣看著家己按怎受苦。」 |
| 11:16 | 上主對摩西講：「你著召集七十個長老，就是你所識，做人民的長老及官長的來，互𪜶及你徛佇會幕頭前。 |
| 11:17 | 我欲降臨佇遐及你講話，嘛欲將降落佇你身上的神分互𪜶；𪜶就及你分擔管理人民的擔，才免你家己一個擔當。 |
| 11:18 | 你嘛著給人民講：『恁著家己分別作聖，準備明仔載食肉，因為上主有聽著恁啼哭，講：互阮有肉通食！阮佇埃及真好。所以上主欲互恁有肉通食。 |
| 11:19 | 恁毋是干焦食一日、兩日、五日、十日、二十日； |
| 11:20 | 伊欲互恁食歸個月，食到肉對恁的鼻孔噴出來，食甲畏；因為恁棄拺住佇恁中間的上主，給伊哭賴講：阮哪著出埃及？』」 |
| 11:21 | 摩西講：「諸個及我做夥的人民，干焦行路的查甫人就有六十萬，你講：『我欲互𪜶歸個月攏有肉通食。』 |
| 11:22 | 豈有夠額的牛群、羊群通刣來互𪜶食？給大海所有的魚攏掠來，豈有夠𪜶食？」 |
| 11:23 | 上主對摩西講：「你是看上主的氣力無夠是無？今你欲看著我的話實現。」 |
| 11:24 | 摩西出去，將上主的話給人民講，閣召集人民中間的長老七十人，互𪜶徛佇會幕的四周圍。 |
| 11:25 | 上主佇雲中降臨，對摩西講話，閣將降落佇伊身上的神，分互彼七十個長老。上主的神臨到𪜶的時，𪜶就親像先知入神講話；以後此個事無閣發生。 |
| 11:26 | 有兩個佇名單內面的長老，伊利達及米達，猶原留佇營內。𪜶無去會幕遐，毋拘上主的神嘛臨到𪜶，𪜶就佇營內講先知的話。 |
| 11:27 | 有一個少年人走來給摩西報告：「伊利達及米達佇營內入神講話。」 |
| 11:28 | 對少年就做摩西的助手，嫩的子約書亞，講：「請我的主摩西給𪜶禁止。」 |
| 11:29 | 摩西給伊講：「你為著我啲怨妒𪜶是無？苦𣍐得上主將伊的神賜互伊所有的子民，互𪜶攏做先知。」 |
| 11:30 | 後來，摩西及以色列的長老就倒去營內。 |
| 11:31 | 上主降鵪鶉 上主起一陣風，對海裡給鵪鶉吹來佇營地周圍，四箍輾轉有一日的路程赫闊，離地面大約一公尺高。 |
| 11:32 | 人民歸暝歸日及第二日歸日，攏起來掠鵪鶉；掠上少的嘛有十堆，攏排佇營地四圍。 |
| 11:33 | 肉猶佇𪜶的嘴內啲哺，上主就對𪜶發受氣，降大瘟疫拍𪜶。 |
| 11:34 | 彼個所在就叫做基博羅‧哈他瓦，因為𪜶佇遐埋葬許個貪慾的人。 |
| 11:35 | 以色列人對基博羅‧哈他瓦去到哈洗錄，就住佇遐。 |