| 章節 | 現代台語漢字2021版經文 |
| 1:1 | 請安 我是基督耶穌的僕人保羅，奉上帝選召作使徒，特派來傳伊的福音。 |
| 1:2 | 此個福音是上帝早前通過伊的眾先知記佇聖經的應允， |
| 1:3 | 啲講起伊的子咱的主耶穌基督：對人性來講，伊是大闢的後代；對聖潔的神性來講，上帝互伊對死人中閣活，用大能力顯明伊是上帝的子。 |
| 1:4 | 併於上節 |
| 1:5 | 阮對伊得著恩賜作使徒，為著基督的名欲互萬民信來順趁， |
| 1:6 | 嘛包含恁諸個受選召歸屬耶穌基督的人。 |
| 1:7 | 我寫此張批互恁所有住佇羅馬，上帝所疼，所選召作伊信徒的人。 願咱的父上帝及主耶穌基督賜恁恩典及平安！ |
| 1:8 | 感謝的祈禱 代先，我通過耶穌基督為著恁眾人感謝我的上帝，因為恁的信德已經傳遍全世界。 |
| 1:9 | 我宣揚伊的子的福音，用心靈啲服事彼位上帝通給我作證，我常常數念恁， |
| 1:10 | 不時佇祈禱中懇求上帝照伊的好旨意給我開路，互我無久就會當順利去恁遐。 |
| 1:11 | 我真愛見恁，通及恁分享一寡屬靈的恩賜，互恁堅強； |
| 1:12 | 就是我到恁中間的時，恁通過我的信仰，我通過恁的信仰，互相得著鼓勵。 |
| 1:13 | 兄弟姊妹，我真愛恁知，我真多遍計劃欲去恁遐，通及佇其他外邦人的中間仝款，嘛佇恁中間收成一寡果子，毋拘到今猶有阻擋。 |
| 1:14 | 無論什麼款人，開化抑是未開化的，有智慧抑是無智慧的，我攏欠𪜶的債。 |
| 1:15 | 所以，我迫切向望嘛會當將福音傳互恁佇羅馬的人。 |
| 1:16 | 福音的大能力 我無看福音做見笑，因為此個福音是上帝的大能力，欲拯救所有信的人，代先猶太人，後來外邦人。 |
| 1:17 | 因為此個福音有啟示上帝的義，此個義對頭到尾攏是通過信來得著。照聖經所記載：「義的人會對信來活。」 |
| 1:18 | 人類的罪 上帝對天頂發出受氣，譴責所有不虔不義的人；𪜶的不義阻擋人識真理。 |
| 1:19 | 因為上帝有對𪜶顯明伊本身，所以𪜶應該對上帝有清楚的認識才著。 |
| 1:20 | 對創世以來，上帝永遠的大能力及神聖，雖然肉眼看𣍐著，毋拘通過受造的物會當清楚看見，所以𪜶攏𣍐當推責任。 |
| 1:21 | 因為𪜶雖然識上帝亦無尊重伊做上帝，嘛無給伊感謝；𪜶的思想反轉變做空空，心思愚戇，充滿烏暗。 |
| 1:22 | 𪜶自稱聰明，其實愚戇。 |
| 1:23 | 𪜶無將榮光歸互𣍐死滅的上帝，反轉去拜會死滅的人、飛鳥、禽獸、蟲𧒴等的像。 |
| 1:24 | 所以，上帝出在𪜶趁家己心內的慾望去做無清氣的代誌，致到彼此蹧躂家己的身體。 |
| 1:25 | 𪜶用虛假替換上帝的真理。𪜶敬拜，服事被造物，無敬拜彼位造物主 — 伊才應該永遠得著稱讚。阿們！ |
| 1:26 | 因為按呢，上帝出在𪜶放縱通見笑的肉慾：查某人及查某人用違反自然的性關係代替及查甫人自然的關係； |
| 1:27 | 查甫人嘛仝款放拺及查某人自然的性關係，彼此慾火攻心；查甫人及查甫人做見笑的代誌，結果著受偏差的行為該受的報應。 |
| 1:28 | 既然𪜶無欲真正認識上帝，上帝就出在𪜶的心思敗壞，去做無應該做的代誌。 |
| 1:29 | 𪜶充滿逐款的不義、歹心、貪心、惡毒、滿心怨妒、謀殺、鬥爭、奸詐、陰謀、講尻脊後話、 |
| 1:30 | 誹謗、怨恨上帝、侮辱人、驕傲、誇口、製造是非、忤逆父母、 |
| 1:31 | 無明理、無守約、無情、無憐憫。 |
| 1:32 | 𪜶雖然知，照上帝公義的判斷，做諸個代誌的人應該死；𪜶毋若家己做，甚至嘛贊成別人按呢做。 |