| 章節 | 現代台語漢字2021版經文 |
| 26:1 | 保羅為家己辯護 亞基帕對保羅講：「准你為著家己辯護。」保羅就伸手開始辯護： |
| 26:2 | 「亞基帕王，今仔日會當佇你的面前為著猶太人控告我一切的事申辯，我感覺萬幸。 |
| 26:3 | 因為你對猶太人的慣例及爭論的問題特別精通，所以我懇求你耐心聽。 |
| 26:4 | 「我對少年到今，起頭佇我本國，後來佇耶路撒冷，作人按怎，所有的猶太人攏知。 |
| 26:5 | 𪜶已經識我真久，若肯，會當為著我作證。我作一個法利賽人，有照阮的宗教上嚴格教派的要求啲生活。 |
| 26:6 | 現在我徛佇遮受審判，是因為我向望上帝對阮祖先的應允會實現； |
| 26:7 | 阮十二支族的同胞暝日熱心敬拜嘛是為著欲互此個向望實現。王啊，為著此個向望，我才受猶太人控告。 |
| 26:8 | 上帝互死人閣活此項代誌，恁是按怎斷定𣍐當相信？ |
| 26:9 | 「以前我本身嘛想講著用逐款的方法來反對拿撒勒人耶穌的名。 |
| 26:10 | 我佇耶路撒冷確實有按呢做，毋若有對祭司長領受權柄掠真多信徒關監，閣佇𪜶受處死的時嘛表示贊成。 |
| 26:11 | 我時常佇各地的會堂給𪜶刑罰，強迫𪜶褻瀆此個信仰，閣用暴力對待𪜶，甚至去到外國的城市給𪜶迫害。」 |
| 26:12 | 保羅悔改的經過 ( 徒 9:1-19 22:6-16 ) 「有一遍，我帶祭司長的權柄及命令去大馬士革。 |
| 26:13 | 王啊，佇半路，中晝的時，我看著比日頭閣較強的光對天頂照落來，給我及同行的人罩啲。 |
| 26:14 | 阮攏跋落去土腳。我有聽著一個聲，用希伯來話對我講：『掃羅，掃羅，你是按怎啲迫害我？你按呢做，親像用拳頭母啲掙石獅，家己討皮疼。』 |
| 26:15 | 我問講：『主啊，你是什麼人？』主講：『我就是你啲迫害的耶穌。 |
| 26:16 | 起來，徛啲；我對你顯現是欲派你做我的僕人為著所看見關係我的事，以及將來欲對你顯現的事作證。 |
| 26:17 | 我欲對以色列人及外邦人的中間給你救出來，差遣你去𪜶遐， |
| 26:18 | 開𪜶的目睭，互𪜶離開烏暗進入光明，離開撒旦的權勢歸向上帝，互𪜶對信我得著赦罪，閣承受作上帝選民的地位。』」 |
| 26:19 | 保羅說明伊的工作 「所以，亞基帕王，我無違背對天來的異象。 |
| 26:20 | 我代先對大馬士革及耶路撒冷的人，後來對猶太全地的人，嘛對外邦人傳道，勸𪜶著悔改來歸向上帝，閣著用行為證明𪜶有真正悔改。 |
| 26:21 | 為著此個緣故，猶太人佇聖殿內掠我，想欲刣我。 |
| 26:22 | 到今仔日，我得著上帝的幫贊，會當徛佇遮對尊貴及卑微的人做見證。我所講的，及先知以及摩西所講的仝款，是關係將來欲發生的事， |
| 26:23 | 就是基督一定著受苦，成做頭一個對死人中閣活的，通將拯救的光傳互猶太人及外邦人。」 |
| 26:24 | 保羅按呢為著家己啲辯護的時，非斯都對伊大聲喝：「保羅，你起狂啦；你的博學互你起狂啦！」 |
| 26:25 | 保羅講：「非斯都閣下！我並無起狂；我所講的話真實閣合理。 |
| 26:26 | 因為王知諸個代誌，我才敢大膽對王講。我相信王對諸個代誌攏真清楚，因為所發生諸個代誌無人毋知。 |
| 26:27 | 亞基帕王，你有相信先知無？我知你有。」 |
| 26:28 | 亞基帕對保羅講：「你講幾句仔話就欲說服我做基督徒噢！」 |
| 26:29 | 保羅應講：「無論幾句仔話抑是真多話，我祈求上帝，毋若是你，連今仔日佇遮所有聽我講話的人嘛攏會及我仝款，毋拘無親像我互人用鐵鍊鍊啲。」 |
| 26:30 | 王、總督、百妮基，及同坐的人攏徛起來。 |
| 26:31 | 𪜶退出了後互相談論講：「此個人並無犯著什麼該死抑是著關監的罪。」 |
| 26:32 | 亞基帕對非斯都講：「此個人若無對皇帝上訴，早就通給伊放啦。」 |